Riyadh: Riyadh mein E-Government ke mahireen ke ek haliya Virtual ijlaas mein is baat ka jaiza liya gaya ke kis terhan mumalik coronavirus ki waba ke douran apne shehrioun ko kamyabi se jadeed Technology ke zariye Electronic khidmaat ya E services faraham kar satke hain. Is ijlaas ka ihtimaam Saudi Arab ki wizarat muwasilat aur Information tecnology ne kiya tha jis ka unwan waba aur waba ke baad Government ki haiyat tha. Ijlaas mein lockdown ke douran E-Government ki janib se ada kiye gaye ahem kirdaar par roshni daali gayi aur bataya gaya ke kis terhan sab afraad ko khidmaat faraham karne ke liye E Platforms ne madad faraham ki. Ye bohat saaray mumalik ke liye sabaq bhi hai ke wo digital system ki taraf jane ke liye apni koshisho mein ziyada taizi layein. Is ijlaas ke maheman muqarareen mein Saudi E government programme Yesser ke CEO Ali Al-Asiri,, Chief executive of Information aur government Authority Bahrain Mohammed Ali Al-Qaed, Smart Dubai office ki director general , Dr. Aisha bin Bishr aur Deloitte Digital ke Global Head shaamil they. Mahireen ne kaha ke waba ke is bohraan ke douran hukoomatoun ne ek hyper connected duniya muta-arif karwai aur is ke zariye apne shehrioun ko digital platforms ke zariye awaami khidmaat faraham ki gayeen. Ali Al-Asiri ne kaha ke digital nizaam ki taraf muntaqili sirf strategic vision , Policies, Information aur commutation technology aur hunarmand afradi qowat ki badolat hi mumkin hai. Ijlaas mein is baat par ittafaq kiya gaya ke E-Government ka bunyadi maqsad apne shehrioun ko shafaaf, Mehfooz, bar waqat aur kam kharch par awaami khidmaat ki farahmi ko yakeeni banana hai. Ali Al-Asiri ne is mauqa par Saudi Arab ki digital nizaam ki janib kamyabi se muntaqili ke safar aur coronavirus ki rokk thaam ke liye gharoun mein reh kar kaam karne se mutaliq sherka ko aagah kiya. Hamara gharoun mein reh kar kaam karne ka tajurbah bohat kamyaab raha aur ye sirf digital nizaam ki taraf muntalqi ki badolat hi mumkin huwa hai jo ke Saudi Arab ke vision 2030 ka ek hissa hai. Unhoun ne kaha ke hamaray mulk ne digital nizaam ki janib muntaqili ke hawalay se badi pesh qadmi ki hai aur aqwam mutahidda ke haliya E-Government Index mein Saudi Arab 193 mumalik mein se 41 we number par aaya hai. Gharoun mein rehna, Samaji faasla barqarar rakhna aur Tele working jaisi haliya nai haqiqtain duniya bhar ki hukoomatoun par zor day rahi hain ke wo apne shehrioun ko aasaan electronic khidmaat ki farahmi ke liye murawaja qawaneen ko ziyada aaasaaan banayen. Mahireen ka is baat par ittafaq tha ke digital nizaam ki taraf safar aur balatatal aur mehfooz khidmaat ki farahmi ke liye hukoomatoun ko Cyber security, Idaroun ki istedad badhaane, Awam mein aagahi peda karne aur karobari tasalsul ke tareeqoun ko behtar karne par tavajja dainay ki ashad zaroorat hai. –YTN STAFF