Manama: Bahrain ne Coronavirus ke phelao ko rokne ke liye ayed pabandioun mein narmi ka elaan kardiya hai. Media ke mutabiq wizarat sahet ke hukkaam ne Press Conference mein kaha ke Bahrain mein dukanain aur sanati o karobari idaray khole jayenge taham Restaurants band rahenge.
Yaad rahay ke Bahrain ne March ke aakhir mein ghair zurori dukanain aur karobari marakaz band kar diye gaye they aur berooni afraad ke dakhlay par pabandi laga di thi. Wizarat sahet ke hukkaam ne mazeed kaha ke jo dukanain ya idaray khole ja rahay hai mulazimeen aur sarfeen ke liye laazmi hai ke wo Mask pehnein aur samaji faaslay ki hidayat par amal karen.
Hukkam ke mutabiq Cinema ghar, Sports ke marakes band rahenge. Wazeh rahay ke Bahrain mein Coronavirus se ab tak 8 afraad halaak ho chukay hain jabkay mutasireen ki kul tadaad 3720 hai. Khleji mumalik ne Ramadan ke aaghaz ke sath hi Curfew aur degar pabandioun mein narmi kardi thi. –YTN STAFF