Riyadh: Saudi Arab mein wizarat Islami umoor ne kaha hai ke sarkari ijazat ke baghair Online Lectures dainay, Iftaar dastar khawan laganay aur Masajid mein aitekaf ki ijazat nahi hogi. Tafseelaat ke mutabiq wizarat Islami umoor ne jari bayan mein kaha hai ke Ramadan ul Mubarak ke istaqbaal ki tamam tayyariyan mukammal hain. Is mah ke douran mutadid Program honge. Wizarat ne wazeh kiya hai ke beroun mumlikat Islami marakaz aur srfaratkhanoun ke matehat dainee shobo ke tavassut se khajorin taqseem karai jarahi hain jabkay harmin sharifin ke aymeh ki telawat ka fori tarjuma mutadid zabanoun mein pesh kiya ja raha hai.
Wizarat ne apne bayan mein kaha ke tamam Masajid mein jamaat se namaz aur jummay par lagai gayi pabandi Ramadan mein bhi barqarar rahegi. Masajid se sirf farz namazoun ki Azan dainay par iktafa kiya jayega. Corona bohraan khatam honay tak Masajid par aitekaf par pabandi huga. Agar kisi imam ne aitekaf ke liye Masjid kholi to is se bazparas hogi. Wizarat Islami umoor ne tavajja dilae hai ke jo Mableghin aur Dayan wizarat se tehreeri ijazat liye baghair Social Media par dainee waaz day rahay hain ya mazhabi pegham ya Lectures pesh kar rahay hain un sab ke khilaaf tadeebi karwai hogi. Koi bhi mubalagh ya khateeb wizarat se ijazat liye baghair dawati sar garmioun ka majaz nahi.
Wizarat ne muqami shehrioun aur muqeem ghair mulkioun se Appeal ki ke agar inhen is qisam ki kisi khilaaf warzi ka ilm ho fori tor par mushtarqa rabita markaz 1933 par mutala karen. Wizarat Islami umoor ne ek baar phir takeed ki ke kisi Masjid ya is se mut-tasil maidan ya ihatay mein Iftaar dastarkhawan laganay par pabandi hai. Kisi bhi Masjid ka imam Iftaar dastarkhawan laganay ke liye atiyat jama nah kere. Ramadan Ration ke liye bhi atiyat jama karne ki ijazat nahi.
Wizarat Islami umoor ne kaha ke tamam barre-aazmoun ke 24 mulkoun mein 200 Ton khajorin Shah Salman ki janib se tohfay ke tor par taqseem ki jayen gi. Is ki tayyariyan karli gayi hain. Wizarat ne apne bayan mein kaha ke dainee aur ilmi asbaq, Seminar, Lectures aur Online Applications ke zariye malomati masabaqoun ki ijazat day di gayi hai taakay duniya bhar ke musalman quran o sunnat ke mutabiq apni zindagi guzaar saken. –YTN STAFF