New Delhi: Jamia Millia Islamia mein March karne walay talba par police ki mojoodgi mein goli chalanay walay waqea ki sakht muzammat karte huve Congress ke Leader intikhab aalam ne daawa kiya ke ye ek markazi wazeer ke ishtial angaiz bayan ka natejah hai jis mein khula khullam goli maarne ki baat keh rahay hain. Unhoun ne kaha ke Shaheen Bagh khatoon muzahireen aur Jamia Millia Islamia mein jari muzahirey ke baray mein musalsal BJP aur is ki hukoomat ishtial angeez bayan day rahi thi aur muharezeen ko maarne par aksa rahi thi. Guzashta dinoun ek markazi wazeer Stage par daish ke ghaddaroun ko jootay maro naaray lagawate rahay aur ye naara police ki mojoodgi mein laga lekin wazeer e dakhla Amit Shah is par koi karwai nahi ki balkay wo isi terhan rastay par chaltay hue logoun se appeal ki ke itna zor se Button dabaunga current Shaheen Bagh tak puhanche.
Unhoun ne kaha ke BJP ek rukan parliament ek ghanta mein muzahira khatam karne ki baat kar rahay they lekin un logoun ke khilaaf ab tak koi karwai nahi hui hai jis ka nateeja hai ke aaj Jamia Millia Islamia mein ek nojawan muzahireen par police ki mojoodgi mein goli chaladi. Unhoun ne sawal kiya ke itni badi tadaad mein police ki mojoodgi ke bawajood koi goli kaisay chala sakta hai jab tak is ke peechay koi nah ho. Unhoun ne kaha ke jamhoori Hindustan mein ye din aagaye hain ke hukoomat ka wazeer goli maarne ke liye keh raha hai. Awam kis par bharosa kere. –YTN STAFF