6 Saal qabal jis ka intqaal hochuka hai is ke khilaaf UP police ki notice
Lacknow: Uttar Pradesh mein police ke zulm aur be qasoor logoun ko nishana Bannee janay ka maamla lagataar badhta hi jaraha hai. Charaoun janib se aawazian uth rahi hain ke BJP hukoomat ne apne agenday ke tehat tamam be qasoor logoun ko giraftar kiya hai jin mein se ziyada tar aqliati tabqa se talluq rakhtay hain. Itna hi nahi, Bohat se logoun ko muzahira ke douran hue tashadud mein awaami malkiat ke nuqsaan ki bharpayi karne ka qanooni notice bhi bheja gaya hai. Jin logoun ko aisay notice miley hain un mein zindah afraad ke ilawa un logoun ke naam bhi mojood hain jo is waqt is duniya mein hi nahi hain, Jin afraad ke khilaaf Notices rawana ki gayi hain un mein se ziyada tar ghareeb tabqay se talluq rakhtay hain jo kisi terhan mazdoori waghera kar ke apni zindagi guzartay hain.
Uttar Pradesh mein shehriat qanoon ke khilaaf hue pur-tashaddud muzahiroun par Police ki karwai lagataar jari hai aur ab tak kayi logoun ke gharoun par notice bhaije ja chuki hai. Is darmain kayi maamloun mein UP Police ki laparwai to samnay aa hi rahi hai, Un ki bar bariat ki khabrain bhi khoob surkhiyan ban rahi hain. Ek aisa hi taaza maamla Uttar Pradesh ke Firozabad Police ka samnay aaya hai jis ne Police mehakma ko hi kadkehray mein khada kar diya hai. Darasal Firozabad Police ne shehriat qanoon ke khilaaf muzahira se mahol kharab honay ke andesha ko dekhte hue 200 logoun ki shanakht karte hue unhein notice jari kiya hai. Herat mein daalnay wali baat ye hai ke Police ne Firozabad ke ek marhoom shakhs ke khilaaf bhi notice jari kar diya hai.
Media zaraye se mousool ho rahi khabroun ke mutabiq Banne Khan ka intqaal 6 saal qabal ho chuka hai aur Firozabad police ne un ke naam se notice jari kiya hai jis ke baad loog police mehakma ka mazaq bana rahay hain. Police ki janib se Banne Khan ke naam jari notice mein likha gaya hai ke unhein City Magistrate ke samnay pesh hona hai. Is notice mein ye bhi likha gaya hai ke Banne Khan ko 10 lakh rupay ka machalka day kar zamanat leni hai. is notice ko dekh kar Banne Khan ke ahal khanah mein hungama ki soorat peda hogayi aur wo heran o pareshan hogaye.
Qabil zikar hai ke guzashta saal 20 decemeber ko shehriat qanoon ke khilaaf Uttar Pradesh mein ho rahay muzahiroun ke douran tashadud barpaa hogaya tha jis ke baad aisay 200 logoun ki shanakht ki gayi thi jin se Firozabad ke aman ko khatrah mehsoos kiya gaya. Unhi 200 logoun mein Banne Khan ka naam bhi shaamil hai. Is ke ilawa bhi kuch aisay naam is fehrist mein shaamil hain jis ne logoun ko herani mein daal rakha hai.
Bataya jata hai ke mazkoorah fehrist mein shaamil 2 aisay shakhs ke naam bhi samnay aaye hain jin ki omar 90 saal se zayed hai. 1 shakhs ka naam Sufi Ansar Hussain hai aur un ke baare mein bataya jata hai ke wo guzashta takreeban 58 saal se Jamia Masjid mein apni khidmaat injaam day rahay hain. Is omar mein un ke zareya kisi tashadud ki umeed nahi ki ja sakti aur police ke zareya un ke naam notice jari kiye jane par loog sawal utha rahay hain. Isi terhan 93 sala Fasahat Mir Khan ka naam bhi is fehrist mein dekh kar sabhi shashdar hain. Fasahat Khan ke baare mein to ye bhi bataya jata hai ke wo samaji karkun hain aur sabiq sadar jamhooria hind APJ Abdul Kalam se bhi un ki mulaqaat ho chuki hai.
Fasahat Khan ke betay ne apne waalid ke khilaaf notice jari kiye jane par mayoosi ka izhaar kiya hai. Unhoun ne media se baat karte hue kaha ke samaji karkun ki hesiyat se fasahat Mir Khan ka naam pooray shehar mein mashhoor hai. Mere waalid ko sadar jamhooria APJ Abdul Kalam se Rashtrapati Bhavan mein mulaqaat karne ka sharf haasil hai aur unhein police ne jis terhan paband kiya hai wo samajh se balater hai. –YTN STAFF