New Delhi: Hindustan ki 9 reyaston aur markaz ke zair control ilaqon mein guzashta 24 ghanton ke douran Corona ( Covid-19 ) ki waba se koi mout nahi hui. Shumal mashriq ki reyaston Arunachal, Magalia, Mizoram, Tripura, Nagaland aur markaz ke zair control ilaqon, Ladakh, Chandigarh, Nagar Haveli aur Daman and Diu guzashta 24 ghanton ke douran corona se koi mout nahi hui.
Mangal ko wizarat sehat aur khandani behbood ki janib se jari taaza tareen adaad-o-shumaar ke mutabiq guzashta 24 ghanton ke douran mulk mein corona ke 46,709 naye mareez ke Report ke baad mutasireen ki majmoi tadaad 75.97 lakh hogayi. Is waqt mulk mein corona ke jumla 7.48 lakh fa-aal mareez hain aur ab tak 67.33 lakh afraad is jaan lewa waba ko shikast day chuke hain.
Mulk ki janoobi riyasat Karnataka mein guzashta 24 ghanton ke douran corona ke 3050 mareezon ki kami se fa-aal mareezon ki tadaad 1.06 lakh reh gayi hai. Abadi ke lehaaz se mulk ki sab se badi riyasat Uttar Pradesh mein corona ke 1401 mareez kam hue jis se mutasireen ki majmoi tadaad 31495 rahengi jabkay is jaan lewa waba se ab tak 6685 afraad halaak aur 4.18 lakh mareez shifayab hue hain.
Tamil Nado mein fa-aal mareezon ki tadaad 38093 hogayi hai aur ab tak 10,691 afraad halaak ho chukay hain. Wahein is riyasat mein 6.42 lakh afraad jaan lewa waba se shifayab hue hain. Kerala mein fa-aal mareezon ki tadaad 92,831 hogayi hai aur 1182 afraad luqmah ajal ban chuke hain jabkay sehat mand afraad ki tadaad badh kar 2.52 lakh hogayi hai. Riyasat Odessa mein corona ke 19,619 fa-aal mareez hain aur 1152 afraad luqmah ajal ban chuke hain jabkay jaan lewa waba se 2.49 lakh mareez sehat mand hue hain.