New Delhi: Social Democratic Party of India ( SDPI ) ke qaumi sadar MK Faizi ne apne jari kardah akhbaari bayan mein markazi zarayi Bills manzoor kiye jane ki mukhalifat karne par opposition ke 8 members parliament ko ek hafta ke liye parliament ke Monsoon ijlaas mein shirkat se moattal karne ke iqdaam ko jamhoriat mukhalif qarar dete hue kaha hai ke yeh RSS ki fashist nazriye se chalne wali hukmaran jamaat ki ekhtelaaf raye se adam rawadari ka ek namona hai.
Hukoomat se akhtelaaf raye aur sawal karne ki azadi ek sehat mand jamhoriat ke khobsorat anasir hain. Fashist jamhoriat se khaufzadah hain aur un ko usoolon ki koi qader nahi hai. Hukoomat jin bills ko baghair kisi rukawat ke manzoor karna chahti hai woh kisaan mukhalif bil hain jis se sirf Corporate ko madad haasil hogi, Kashtkaron ko nahi. Mulk bhar ke kisaan un tabah kun bills ke khilaaf ehtijaj kar rahay hain. Hukoomat Bills par behas se bhi khaufzadah hai lehaza woh wazeer zaraat ke jawab aur raye dahandgi ke liye ewaan ko ek din multawi karne ke opposition ke mutalbe ko nazar andaaz karte hue hukoomat ne jald baazi mein Bills ko manzoor kiya hai. Rajya Sabha mein hangame ke darmiyan yeh bill sooti voton se manzoor kiya gaya jahan hukmaran jamaat ki aksariyat nahi hai.
SDPI qaumi sadar MK Faizi ne kaha 8 members parliament ko moattal karne ke iqdaam ko jamhoriat mukhalif hai mazeed kaha hai ke intahaa pasand dayen baazu ke fashistin ke daur hukoomat mein Hindustan mein jamhoriat maazi ke daur ki daastaa’n ban rahi hai. SDPI mulk mein jamhoriat mukhalif rujhan aur hukmaran jamaat ki badhti adam rawadari ke baray mein sakht chokas hai. MK Faizi ne umeed ka izhaar kiya hai ke markazi hukoomat ki bad-intezami aur ghair ikhlaqi karwaiyon ke khilaaf mulk ke awam jamhoori rad-e-amal ka izhaar karen ge aur yeh ke woh jamhoriat ko halaak nahi honay den ge.