Riyadh: Saudi Arab mein 3 sagay behnoun ne Riyadh ke Alshabilia muhallay mein Baqala ( General Store ) khol liya hai jis ke pooray ilaqay mein charchay hain. Tenoun behnoun ko Baqala kholnay ke liye rakawaten pesh ayen lekin unhoun ne datt kar mushkilaat ka muqaabla kiya. Tafseelaat ke mutabiq Saudi khatoun Noof ne muqami sahafi ko Interview mein kaha ke 9 mah qabal apni behnoun ke sath mil kar mithai ki dukaan se kaarobar shuru kiya tha. Rafta rafta is mein samaan badhaya aur ab ye food center mein tabdeel ho chuka hai.
Noof ke mutabiq home delivery ka silsila bhi shuru kiya hai. Koi karkun aisa nahi tha jo Baqala se samaan gharroun tak pouncha sakay. Ye kaam bhi wo khud hi kar rahi hain. Tenoun behnoun ne is azm ka izhaar kiya ke jald apne Baqala ke barabar wali dukaan bhi karaye par haasil kar lengi kyunkay un ka kaarobar musalsal badh raha tha. Muqami sahafi ne Noof ka ye khayaal sun kar dukaan ke maalik se rabita qaim kiya aur barabar wali dukaan tenoun behnoun ko karaye par dilwa di aur aindah 6 mah ka kiraya bhi apni jaib se ada kiya hai.
tenoun behnoun ki jad-o-jehad ki kahani social media par dekh kar chhootey aur darmiyanay size ke idaroun ki general Authority ( Munshaat) ne Noof aur is ki behnoun se rabita karkay un ki hosla afzai ki hai. Report mein bataya gaya hai ke kayi Saudi sarmayakar aur maldaar shaksiaat Saudi behnoun ke kaarobar ko kamyaab bananay ke liye un se bharpoor taawun kar rahay hain. 9 mah qabal shuru honay wala Baqala ek baday food center mein tabdeel honay ja raha hai. –YTN STAFF