Karnool: 105 se zayed omar ki zaeef khaton Covid se robah sahet hogayi. Ek aisay waqt jab is waba se mutasir honay walay apni umeed khorahe hain, Is khatoon ne azm aur himmat ke sath corona ka muqaabla karte hue dosaron ke liye misaal qaim kar di. Is khatoon ki kahani tamam ke liye ek jazba se kam nahi hai. AP ke zila Karnool ke Paddabada Khana se talluq rakhnay wali 105 sala B. Mohanamma is marz se robah sahet hogayi aur hospital se discharge kar di gayi. Wo is omar mein bhi Yoga karti hai. Is ke shohar ki mout 1991 mein hui thi.
Is joday ko 8 aoladin hai jin mein 5 betiyan aur 3 betay shaamil heen. Ek betay ki haal hi mein mout hui hai. Yoga ke sath sath ye khatoon is omar mein bhi geyan dheyaan, Rozana chehal qadmi bhi karti hai. Karnool zila mein corona ke mamlaat mein izafah ke pesh-e-nazar Volunteers ki janib se ghar ghar survey kiya gaya. Ye Survey 60 saal se zayed omar ke afraad ke corona test ke liye kiya gaya jis mein pata chala ke ye khatoon bhi is se mutasir hogayi hai jis ke baad is ke rishta daaron ney is ko hospital muntaqil kiya jahan is ka kamyabi ke sath ilaaj kiya gaya aur ye khatoon rubah sahet hogayi jis ke baad is ku gujesta mah ki 31 tareekh ko hospital se ghar jane ki ijazat day di gayi. Jab is se is ki sahet ka raaz poocha gaya to is ne daawa kiya ke wo apni rozana ki aadato ki wajah se hi corona par qaboo pasaki. Is ne kaha ke wo abhi bhi Yoga karti hai. Yahi is ki sahet ka raaz hai. Is ne is ko behtar tibbi sahuliyaat faraham karne par tibbi ehalkaron aur is ke afraad khandan ka bhi shukriya ada kiya.