Yemen ki hukoomat ne ilzaam ayed kya hai ke Iran Nawaz Houthi militia ki janib se mulk mein musallat ki gayi jung ke nateeja mein bees laakh se zayd bachay mehnat mushaqqat karne par majboor hogaye hain. yemeni khatoon wazeer baraye samaji umoor o mehnat Abtaj Al Kamal ne bataya ke Houthis ki musallat kardah jung ke nateeja mein do million se zayd bachay mehnat mushaqqat par majboor hain. un ka kehna tha ke Houthi militia ki taraf se yemeni bachon ko jung ke eendhan ke tour par istemaal karne ka silsila hanoz jari hai. ab tak Houthi militia 23 hazaar bachon ko jung ke liye bharti karchuki hai. Rawan saal ke douran ab tak 2500 bachon ko jung ke liye bharti kya gaya. khabar rasan idaray ‘Saba’ ke mutabiq wazeer baraye samaji umoor ka kehna hai ke jung ke baais 45 laakh yemeni bachay taleem se mahroom hogaye hain. Houthis ki taraf se jung ke douran schoolon ko danista tour par nishana banaya ja raha hai. Houthis ke hamlon mein mulk bhar mein 2372 school kulli ya juzwi taur par tabah ho chukay hain jab ke 1500 schoolon ko Houthis ne apne campaign mein tabdeel kar rakha hai. Abtaj Al Kamal ka mazeed kehna tha ke Houthi shiddat pasand yemeni bachon ko jung mein jhonknay ka silsila bhi jari rakhay hue hain. bachon ko schoolon se utha kar jungi tarbiyat marakaz muntaqil kardiya jata hai. walidain ko bhi bachon ko jung ke liye bheejwane par majboor kya ja raha hai. unhon ne kaha ke Yemen mein Houthis ki janib se thopi gayi jung ke baais bachpan intehai aziat naak ban gaya hai