Kuwait city: Kuwait ke mehakma shehri hawabazi ne Commercial parwazoun ki bahaali ke jame program ka elaan kiya hai. Yakam August 2020 se Kuwait International Airport Commercial parwaazoun ke liye juzwi tor par khol diya jaye ga jabkay mukammal fazai khidmaat August 2021 se qabal mumkin nahi hoga.
Media ke mutabiq Kuwait ney coronavirus ki waba ki wajah se 13 March se Kuwait International Airport ke liye aur is se parwaazoun ki aamad waraft moattal kar di thi. Kuwaiti hukkaam ke hawalay se bataya gaya hai ke parwaazoun ki bahaali 3 marahil mein hogi. Pehla marhala 6 mah par mushtamal hoga. Shuruvaat yakam August se hogi. Is douran Airport ziyada se ziyada 30 feesad se karkird hoga.
Airport se rozana ziyada se ziyada 10 hazaar afraad safar kar saken ge. Parwazoun ki yomiya tadaad ziyada se ziyada 100 hogi. Dosra marhala bhi 6 mah par mushtamal hoga. Is ki shuruvaat yakam February 2021 se hogi. Is douran Airport ziyada se ziyada 60 feesad tak mo-asar hoga. Har roz 20 hazaar afrad saKuwfar kar saken ge jabkay yomiya 200 parwazoun ki ijazat hogi. Teesra marhala yakam August 2021 ko shuru hoga. Is tareekh se Kuwait International Airport mukammal khidmaat faraham karne ke muaqqaf mein hoga. Har roz 30 hazaar se ziyada afraad safar kar saken ge jabkay parwazoun ki intahi tadaad yomiya 300 tak hugi.