London: World Cup ke douran England and Wales Cricket Board ney Musalman khiladiyon ke liye khusoosi security intizamat tayyar karliye hain. Zaraye ke mutabiq ICC aur England Board ko mukhtalif Mumalik ke Boards ney khiladiyon ki Security iqdamaat ke hawalay se maktoob arsaal kiye they is liye mega event ke douran namaz-e jummay ki masajid mein adaigi ke waqt Security ke ghair mamooli intizamat kiye jayen ge .
Zaraye ke mutabiq Bartanwi Security idaron ney hakumati Hadayat ki roshni mein security ka mansoobah tarteeb day diya hai aur muslim khiladiyon ko Hidayat di gayi hai ke woh namaz-e jummay ki adaigi ke liye masjid janay se qabal security ohdedaron ko zaroor aagah karen. Yaad rahay ke Pakistan Cricket Board ki janib se ECB ko bejeh janey walay maktoob mein muaqqaf apnaya gaya tha ke namaz-e jummay ki adaigi sirf masjid mein hi ki ja sakti hai jis ke liye khiladiyon ko security ki munasib sahuliyaat di jayen. -YTN STAFF