Dubai: Royal Challengers Bangalore ke Captain Virat Kohli jumaraat ku Kings Xi Punjab ke khilaaf apni jeet ka silsila jari rakhna chahtay hain jabkay Punjab ke Captain Lokesh Rahul pichli shikast ko bhulakar wapsi ke iraday se maidan mein utrain ge. Punjab ko Super Over mein Delhi Capitals ke khilaaf Tournament ke apne pehlay match mein shikast ka saamna karna pada tha jabkay Bangalore ne apne pehlay match mein Sunriser Hyderabad ko shikast di hai.
Kohli aathween martaba IPL mein Bangalore ki Captani kar rahay hain aur 3 season ke baad yeh pehla mauqa hai jab un ki team ne Tournament mein fatihana aghaaz kiya. Pichlle 3 season mein Kohli ki team apna pehla match ganwaa baithi thi lekin Bangalore ne jis terhan se IPL 13 ka aaghaz kiya hai is se team ko yaqeenan bohat hosla mila hoga. Kohli ke samnay dosray match mein Punjab ki team hogi jis ne Delhi Capitals ke khilaaf apne match mein jeet ke mawaqay zaya kiye thay aur usay shikast ka saamna karna pada tha.
Punjab muqarara overs mein match khatam karsaktha tha lekin 89 runs bananay walay Mayank Agarwal aakhri over ki aakhri 3 gaindon par kamyabi ke liye darkaar runs bana nahi sake. Mayank panchwin gaind par out hue, Chhutti gaind par ek aur wicket girnay jane se score tie hogaya. Khud Captain Rahul bhi badi inning khailnay mein nakaam rahay aur 21 runs banaye thay. Dosray match mein Rahul ko Virat Kohli ki team Bangalore ke khilaaf ek badi Inning khelne hugi taakay team ka hosla buland rahay. Delhi ke khilaaf match mein Punjab ke liye Mayank Agarwal ne shandaar Inning kheli aur 89 runs ki inning ne team ko fatah ki dehleez ke qareeb kardiya lekin Mayank ko samjhna hoga ke itni badi inning khailnay ke baad match ko khatam karne ki zaroorat hai nah ke kharab shot khail kar wicket khonay ki.