Hyderabad : Wazeer-e-sayahat aur exicse, V Srinivas Goud ne aaj reyasti BJP qaideen ko hukoomat ke khilaaf jhutay ilzamaat aa-ed karne par nishana banaya. aur wazeer-e-aala ki janib se Palamur-Ranga Reddy aab paashi project ko mukammal karne ka elaan kiye jaaney par wazeer-e-aala KCR ka shukriya ada kiya.
Haftay ko media numaindoun se baat karte hue, wazeer-e-sayahat ne BJP par ilzaam lagaya ke woh hukoomat ki Shabih ko kharab karne ke liye jhoot ka sahara le rahi hai.
Unhon ne yaad dilaya ke wazeer-e-aazam Narendra Modi ne mission Bhagiratha ki tareef ki thi. unhon ne sawal kiya ke agar Modi schemes ki tareef karte hain to reyasti party rehnumao ne un schemes mein kis tarhan ghalti payi. mutadid markazi wazraa, Niti Ayog ke sath sath deegar reyaston ne bhi hamaray flahi mansooboun aur programon ki tareef ki hai. agarchay markaz ne niti Aayog ki sifarish ke bawajood riyasat ke liye funds nahi diye the. Magar wazeer-e-aala ne door andeshi se kaam kiya. iska sehra wazeer-e-aala ko diya jayega.
Srinivas Goud ne BJP qaideen par tanz kiya, jinhoun ne unki party ke zair-e-Iqtidaar reyaston ka dora nahi kiya, woh sirf mabham tabsaray kar rahay hain. unhon ne mazeed kaha ke Telangana bijli sameit tamam shobo mein taizi se taraqqi kar rahi hai. –YTN STAFF