Amman: Corona ki waba ke khatray ke pesh e nazar beshtar Arab mumalik mein Eid Ul Fitr ke riwayati ijitmaat par pabandi ayad karne ke sath sath shehrioun se Appeal ki gayi hai ke wo gharoun mein Eid ki Namaz ka ihtimaam karen. Tafseelaat ke mutabiq Urdan ke mehakma uqaaf aur mazhabi umoor ki taraf se jari ek bayan mein kaha gaya hai ke Corona waba ki wajah se peda honay wali soorat e haal mein shehrioun ko hidayat ki jati hai ke Eid ki Namaz apne gharoun mein ada karen.
Urdni wazeer baraye mazhabi umoor Mohammad Al-Khalela ne ek bayan mein kaha ke Eid ki Namaz ki taqbiraat Masajid se Nashar ki jayen gi taham shehrioun ko hidayat di gayi hai ke wo namaz gharoun mein ada karen. Unhoun ne kaha ke Urdan mein Eid Ul Fitr ki namaz ke liye mulk bhar mein muqami waqt ke mutabiq waqt muqarrar kiya gaya hai. Unhoun ne wazeh kiya ke gharoun mein Eid ki namaz ke ihtimaam ka maqsad shehrioun ko Corona ki waba se mehfooz rakhna aur bemari ko mazeed phelnay se rokna hai. –YTN STAFF