Etah : Uttar pradesh ke Etah zila mein hafta ke roz ek cracker factory mein honay walay dhamakay se maalik sameit 6 afraad halaak ho gaye. CO sadar, Irfan Khan ke mutabiq yeh dhamaka aisay ghar mein hua jahan Patakhay banaye jarahay they. Patakhay factory ka license Munni devi ke naam par tha. yeh dhamaka ek cracker may aag lagnay ke baad hua, jab kumba ke kuch afraad Cracker Packaging ke kaam ke sath khana tayyar kar rahay they. dhamakay mein majmui tor par 6 afraad halaak aur mutadid zakhmi hogaye hain. zakhmion ko hospital mein daakhil karaya gaya hai.
Mazkoorah waqea ki ittila mlitay hi zilai magistrate, SPO aur mutadid deegar ahelkaar mauqa par pohanch gaye. ittila ke mutabiq dhamakay ke waqt qareeb 15 afraad factory mein moujood they. kuch log abhi bhi malbay mein phansay hain, imdadi karwai jari hai.
Halaak honay walon ki shanakht, Anjali (11), Sheetal (16), Khushi (7), Rajni (21) and Munni Devi (50). ke tor par hui hai. jabkay chatwein ki shanakht nahi hosaki hai, kyunkay dhamakay ke asr se jism is buri tarhan se kharab hogaya hai ke, tibbi hukkaam ke liye bhi yeh maloom karna mushkil hai ke woh aurat hai ya mard. –YTN STAFF