Lucknow : Yogi hukoomat ke zair UP mein jaraim ka graph kaafi badha hai aur aaye din yahan ke ilaaqoun se koi na koi jurm ki daastaa’n saamnay aati hi rehti hai aur ab asleha ki nok par khatoon ki Ismat rezi ki gayi. riyasat mein mein asleha ki nok par ek khatoon ki ismat rezi ka sansani khez maamla samnay aaya hai.
Ye waqea UP ke gautam budh nagar zila mein pesh aaya, jahan 1 shakhs ek khatoon ke ghar mein ghus kar hathyaar ki nok par is ki mubayyana tor par ismat rezi ki.
Senior police inspector ke media incharge rakesh bhdoria ke mutabiq mutasirah khatoon ne thana sector 49 mein is silsila mein report darj karai hai. report mein isne kaha hai ke 24 august ko ghar par woh aur iski beti akeli thi aur iske shohar kaam se bahar gaye hue they. isi darmiyan iska padosi Pushpendra yadav iske ghar mein ghus gaya aur iski ismat rezi ki.
Khatoon ka ilzaam hai ke is darmiyan iski beti jaag gayi aur mukhalifat karne lagi to mulzim ne unke sath maar peet ki aur tamancha dikha kar maar daalnay ki dhamki di. khatoon ke mutabiq aglay din shohar ke loutney par is ne aap beete sunai aur phir dono sector 116 mein waqay sorkha police station mein maamla ki shikayat karne ke liye gaye, lekin police ne koi karwai nahi ki.
Media incharge ke mutabiq khatoon ka yeh bhi ilzaam hai ke 9 September ko mulzim taqreeban nisf darjan sathiyon ke sath iske ghar aaya aur hathyaar dikha kar iske shohar se ek moahida par dastakhat karwaliya. Rakesh bhadoria ne kaha ke SSP ne waqea ki report darj karne ka hukum diya hai. media incharge ne kaha ke guzishta raat thaana sector 49 police ne is maamla mein Puspendar ke khilaaf ismat rezi ka maamla darj karliya hai aur maamla ki tehqiqaat jari hain. –YTN STAFF