Rajhmundry : Andhra Pradesh mein Telugu roz-nama ke liye kaam karne walay telugu sahafi ko na-maloom afraad ney chaakhu se waar karkay qatal kar diya. tafseelaat ke mutabiq, Telugu akhbar ”Andhra Jyoti“ ke liye kaam karne walay reporter, 49 sala K. Satya Narayan, ki laash mangal ke roz zila Godavari mein waqay unke ghar ke qareeb se mili.
Police ke dog squad, close team, ki madad se tafteesh ka aaghaz kiya gaya aur 3 mushtaba afraad ko hirasat mein liya gaya. sath hi mutawafi ki laash ko post martem ke liye hospital muntaqil kiya gaya. Chaharshambe ke roz ZSP Adnan Nayeem Asim ney jaye waqoo ka doura kiya, aur mutwafi ke ahal-e-khanah se baat ki.
wazeer it-tila-aat wo taluqaat aama Parni nani ney kaha hai ke mazkoorah qatal mein mulawis afraad ke khilaaf sakht karwai ki jayegi. unhon ney kaha ke wazeer-e-aala Y S Jagan Mohan reddy ney police ke director general ko hidaayat ki hai ke woh khatiyoun ka suragh laganay ke liye fori iqdamaat karen.
Jana sena party ke sadar Pawan kalyaan ney is be-hemana qatal ki shadeed alfaaz mein mazammat ki aur usay sahaafat par hamla qarar diya. aur kaha ke ”aisa maloom hota hai ke media ko khaufzadah karne ke maqsad se yeh hamla kiya gaya tha“. pawan kalyan ney mazed kaha ke ”sahafi Satyanarayan , ek mah qabal ek hamlay mein bach gaya tha aur iski ittila police ko di gayi thi, lekin woh usay tahaffuz faraham karne mein nakaam rahi. –YTN STAFF