Hyderabad: Hafta ke ruz riyasat Telangana mein munaqqid hue baldeati intikhabaat ki raye shumari jari hai. Hukmaran Telangana Rashtra Samithi ( TRS ) ne baldeati intikhabaat mein ibtidayi bartari haasil kar li hai. Reyasti Election commission (SEC ne 9 Municipal Corporation aur 120 baldeati idaroun ke votoun ki ginti shuru ki. Mutadid Municipal Wardoun mein TRS umeed waar agay they.
SEC Haam ke mutabiq, Votoun ki ginti 134 marakaz par ki gayi. Is raye shumari ke amal ke liye 10,000 se ziyada afsaraan masroof amal hain. Tawaqqa hai ke shaam tak tamam nataij ka elaan kar diya jaye ga. Charshumbe ke roz 53.37 lakh votoroun mein se 70 feesad ne Municipal Corporation ke 325 aur Municipalities ke 2,727 Counselor muntakhib karne ke liye apna vote diya.
Municipal Corporation mein kul 1,746 umeed waar maidan mein hain, Jabkay 11,099 umeedwaroun ne Municipalities ke liye apni qismat aazmai. Baldiyat mein 77 Wardoun aur ek ward mein shaamil TRS ke umeed waar mutafiqa tor par muntakhib hue AIMIM ke 3 umeed waar balaa muqaabla muntakhib hove hain.
Greater Hyderabad Municipal Corporation ( GHMC ) aur 10 deegar shehri baldeati idaroun ( Corporation ) ke liye intikhabaat nahi hue they, Kyunkay un ki miyad abhi khatam nahi hui hai.
TRS, Jis ne Decemeber 2018 mein riyasat mein dobarah iqtidaar haasil kiya tha, Shehri badli idaroun mein 90 feesad shehri baldeati idaroun ke jeetnay ka yaqeen hai. Jahan, TRS ne tamam 3,052 Municipality Wardoun ke liye umeed waar khaday kiye hain, Wahein Opposition Congress aur BJP ne bal tarteeb 2,616 aur 2,313 umeed waar khaday kiye hain.
Algaraz hukmran jamaat ne ibtidayi tor par bartari haasil karli hai aur usay apni kamyabi ka poora yaqeen hai. Ab dekhte hain ke TRS ka ye yaqeen kamyabi mein badalta hai. Ya nahi. –YTN STAFF