Hyderabad: Kaha jata hai ke mohabbat andhi hoti hai jo ke Ameer, ghareeb, kalay, goray, Saudi aur hindustani ka farq nahi dikhati lekin aksar mohabbat ka anjaam museebat par hi khatam hota hai aur aisa hi kuch Telangana se taluq rakhnay walay 30 sala Sheikh azeem uddin ke sath hua jo kay Saudi arab mein driver ki mulazmat anjaam day raha tha aur mulazmat ke douran usay jis khandan ki woh gaadi chalata tha uss khandan ki 27 sala ladki se mohabbat hogayi.
2 saal ki mohabbat ke baad January 2018 may azeem apne aabadi maqam Nirmal wapas agaya jis ke chand mah baad is ladki ne Oman jaaney ka bahana karte hue Nepal pohanchi jahan se azeem ne usay Hindustan laya aur dono ne May 2018 may shadi karli. is ki ittila milnay par ladki ke waalid ne Hindustan pohanch kar Saudi sifarat khanah mein shikayat darj karwai ke is ki beti ka aghwa kiya gaya hai jis par muqami police ne is jodey ko kamareddy magistrate ke samnay paish kiya.
Jahan ladki ne judge ke samnay apne baaligh honay aur marzi se Azeem se nikah karne ki tasdeeq ki jabkay unka nikah Nawipet mein muqami qaazi ne padha tha aur nikah waqf board mein registered bhi hai. ladki ke is bayan par judge ne dono ko sath rehne ki ijazat di aur ladki ka baap Saudi arab wapas chala gaya lekin is mohabbat ka yeh hi Khushgawar ekhtataam nahi hua balkay is douran ladki haamla hui.
Sheikh azeem ke afraad khandan ke mutabiq ladki ne is douran apne ghar walon se milnay ki khwahish karne ke alawa –apne shohar azeem ke liye job visa ka bhi intizam karne ka iradah zahir kiya jis par sasural walon ne khauf aur khadshaat ka izhaar kiya.
Saudi arab ki bahu ne unse kaha ke kyun ke unki shadi qanooni hai lehaza kisi bhi qisam ka khatrah nah honay ki yaad dehani karwai lekin jaisay hi yeh joda Saudi arab pouncha wahan ki police ne Sheikh azeem ko girftar karte hue salakhon ke peechay pohancha diya jabkay ladki bhi ek ladki ki maa ban gayi. Saudi arab mein Sheikh azeem apni be gunahi saabit karne mein nakaam ho raha hai kyunkay ladki ke waalid ki marzi ke baghair shadi honay ki wajah se Saudi ke qanoon ki wajah se Telangana ka noujawan qaid ki museebat bardasht kar raha hai. –YTN STAFF