Chennai: Tamilnadu may toofani barish ke baais peer ko Coimbatore ki textile city ke qareeb gharoun par deewar girnay se 15 afraad halaak hogaye. Police ke mutabiq, subah taqreeban 5:30 bajey, 20 foot ki deewar chaar makanoun par gir gayi, jiske nateejay mein woh munhadim hogaye aur so rahay afraad halaak hogaye. police aur fire service ke ehalkaroun ney malba hata kar lashein Bar-aamad kee, jinhein post mortem ke liye bhej diya gaya hai.
Wazeer-e-aala ke Palaniswami ney un amwaat par taaziyat karte hue, mutasireen ke lawahiqeen ko 4 laakh rupaye ki maali imdaad dainay ka elaan kiya. Darin-asna , reyasti hukoomat ney barish ki wajah, Chennai, Tiruvallur, Thoothukudi, Cuddalore, Chengalpattu, Ramanathapuram, Kancheepuram, aur Ranipet par mushtamil aath azlaa mein schools band rakhnay ka hukum diya hai. –YTN STAFF