Colombo: Srilankan cricket board ne apni team ke dora Pakistan ki tasdeeq kardi aur sath hi Srilanka ki wizarat difaa ne cricket team Pakistan bhejnay ki ijazat day di hai. Srilanka cricket ke secretary mohan D silva ne kaha ke wizarat difaa ne dora Pakistan ke hawalay se team Pakistan bhejnay ki ijazat daydi.
unhon ne kaha ke dora mansoobah bandi ke tehat hi ho ga, mujh sameit chand ohdedar bhi team ke humrah Pakistan jayenge.
Guzashta haftay Srilanka team ko dora Pakistan ki soorat mein dehshat gard hamlay ki dhamki ki it-tila-aat masool hui theen jiske baad yeh dora barf daan ki Nazar hota dikhayi day raha tha. is mauqa par hukoomat Pakistan ne muamlay mein mudakhlat karte hue Srilankan board ko full proof security intizamaa ki yaqeen dehani karwai jis ke baad is doray ki raah hamwar hui. yaad rahay ke March 2009 mein Srilanka team par Lahore mein kiye gaye dehshat gardi ke hamlay ke baad Pakistan par aalmi cricket ke darwazay band ho gaye they. is hamlay mein 6 Pakistani police ohdedar aur do shehri jaan bahaq ho gaye they jabkay Srilanka team ke khilari aur match ohdedar zakhmi bhi hue they.
Is hamlay ke 8 saal baad Srilankan team Pakistan mein T20 match khailnay raazi hui aur october 2017 mein Pakistan aa kar T20 match khela tha. guzashta mah D Silva ne Pakistan ki janib se kiye gaye intizamaa ka jaiza lainay ke liye security mahireen ke humrah Pakistan ka dora kiya tha. mohan D silva ne kaha ke Pakistan ne hamari team ko sarbarah mumlikat satah ki security ki farahmi ki yaqeen dehani karwai hai. yaad rahay ke Pakistan mein security khadshaat ke sabab Srilanka team ke 10 ahem khiladi pehlay hi dora Pakistan se inkar kar chuke hain.
Srilanka team pehlay hi dora Pakistan ke liye ODI aur T20 squads ka elaan kar chuki hai. Srilankan team Pakistan aamad ke baad 27 September ko pehla ODI match Karachi mein khailaygi jis ke baad series ke baqi ODI matches bal tarteeb 29 September aur 2 october ko Karachi ke national stadium mein khailay jayenge. dono teamon ke darmiyan pehla T20 match 5 october ko Lahore mein khela jayega jiske baad baqi dono matches ki maizbani ki bhi Qazafi stadium 7 aur 9 october ko karega. national stadium Karachi aur Qazafi stadium Lahore mein Srilanka ki series ki tayari ka kam shuru hogaya hai. Karachi mein teen ODI matchon ke liye do pitches ki tayari ka kaam jari hai. –YTN STAFF