Patna: Shehriat tarmeemi bil jaisay firqa parast aur mulk mukhalif qawaneen ke tabah kin aur khatarnaak nataij se khauf zada honay ke bajaye iski mukhalifat karna zaroori hai. ye baat Jammu-o-Kashmir ke muamlay may markazi hukoomat ke yaktarfa faislay ke khilaaf mulazimat se istifa dainay walay IAS ohdedar Gopinathan ne yahan ek taqreeb may kahi.
unhoun ne kaha ke insidaad dehshat gardi ke naam par mojooda hukoomat ne jis terhan awam ko saazish ka shikaar banaya hai wo sirf musalmanoun ke liye nahi balkay mulk ke ghareeb awam ke liye bhi khatarnaak hai, is liye shehriat tarmeemi bil aur NRC aur jaisay siyah qawaneen ke khilaaf awam ku hitejaj karna chahiye. unhoun ne kaha kay NRC se bachney ke liye dastawizaat jama karne ke bajaye iski purzor mukhalfat ki jani chahiye. awam ki shehriat hukoomat tey nahi kar sakti. hamein yeh azm karna chahiye ke hum apne mulk ko firqa wariyat ki bunyaad par taqsim nahi honay denge aur kisi ek firqa ko is ka nishana nahi ban’nay denge.
unhoun ne NRC shehriat tarmeemi bil aur Detention camp ke mauzo par khitaab karte huve kaha ke Iqtidaar sanbhalne walay chand afraad samaaj ki ganga jamni tahazeeb ko tabahi ke baad Hindu rashtra ke rastay par le jana chahtay hain. wo aksriyati aur aqliati abadi ki bunyaad par mulk ko firqa parasti ki aag may jhonkna chahtay hain. shehriat tarmeemi bil aur NRC ki peshkash bhi isi saazish ka hissa hai. ab hamein iske nifaz ka intzaar karne ke bajaye iski sakht mukhalifat karni chahiye, ehtejaj ke ilawa hamaray samnay koi dosra rasta nahi.
Mr. Gopinathan ne kaha ke sawalaat jamhoriat ki jaan hain lekin afsos ki baat ye hai ke aisay siyah qawaneen ke khilaaf mulk bhar may sanahtah chayahuva hai aur har koi zabaan kholnay se dar raha hai. markazi hukoomat kala dhun aur dehshat gardi ke khtama ke naam par jamhoori qawaneen may tarmeem kar ke siyah qawaneen waza karna chahti hai. shehriat tarmeemi bil aur NRC ke naam par musalmanoun ko shehriat se mahroom karne ki saazish ki jarahi hai. iske liye mulk bhar may Detention camp banaye jarahay hain.
Gopinathan ne ilzaam lagaya ke mulk ka wazeer -e-dakhila al-elaan firqa parasti ka card khail raha hai aur sabhi reyastoun ko aydwayzri jaary kar ke Detention camp bananay ka hukum de raha hai. lekin afsos is baat ka hai ke mulk ke awam khamosh hain, Media aur awam sawalaat karne ke bajaye is ke nifaz ka intzaar kar rahay hain jabkay bilaa tafreeq aisay siyah qawaneen ki har satah par mukhalifat karni chahiye. unhoun ne kaha kay hukoomat ki is mansha par khauf zada honay ke bajaye iske khilaaf ehtejaj karna hoga.
Unhoun ne kaha kay Jammu Kashmir ke 80 lakh awam ke bunyadi haqooq par barah-e-raast hamlay ke khilaaf hum ne apni mulazimat chor di, wahan ke muntakhib MP aur MLA ko bhi nahi bakhsha gaya. unhoun ne hukoomat ke is jawaz ki bhi sakht muzammat ki aur kaha ke dehshat gardi ke naam par ye awam ke bunyadi huqooq par barah-e-raast hamla hai. aisay siyah qawaneen ke khilaaf hamein aawaz buland karni hogi.
unhoun ne kaha kay shehriat tarmeemi bil aur NRC se bachao ke liye dastawizaat jama karne ke chakkar may parney ke bajaye is ki purzor mukhalfat honi chahiye warna jis din shehriat kho denge to ehtijaj ke laiq bhi na honge. Gopinathan ne kaha ke aap Vote kisi ko bhi de lekin sawal zaroor karen aur is baat ka azm karen ke hum is ke khilaaf ehtejaj karte rahen ge, iske ilawa koi dosra rasta nahi.
Saminar ki nizamat Mohammad Ghalib ne ki jabkay sadarat DM Dewakar ne anjaam di. iske baad sawal-o-jawab ka silsila chala jis may is mauzo se mutaliq kayi chubhtay huve sawalaat kiye gay. sawalaat karne waloun may Kashif Younis ,Anwar Alhadi, Rawi Yado, Ruby Kumari, waghera ke naam hain. –YTN STAFF