Riyadh: Saudi wizarat tijarat ke tarjuman Abdul Rahman Al Hussain ny kaha hai ke Saudi khawateen mein apne naam se ghair mulkion ko kaarobar karwane walon mein sab se ziyada khawateen ke naam samnay aaye hain. Tafseelaat ke mutabiq Hussain ny ek bayan mein kaha ke haliya ayyaam ke douran ghair mulkion ko apne naam se kaarobar karwane walon ka Record Check kiya gaya to pata chala ke sab se ziyada ghair mulkion ko kaarobar karwane wali Saudi khawateen hain.
Unhoun nay kaha ke har tajir khatoon ka farz hai ke wo apne naam se kiye jaany walay kaarobar ki jumla tafseelaat se aagah ho. Apne tijarti license ki bunyaad par honay walay tijarti muahidon aur tijarti sar garmion se bakhabar rahay. Yaad rahay ke tijarti parda poshi ke naye qanoon ke bamujab sakht sazayen muqarrar ki gayi hain jo Saudi bhi apne naam se ghair mulki ko karobar karega usay paanch baras tak qaid aur pachaas lakh riyal tak jurmane ki saza hogi. Saudi qanoon tijarat ke bamujab koi bhi ghair mulki Saudi ke naam se apne kaarobar ka majaz nahi. Aisi terhan koi bhi Saudi apne naam se kisi bhi ghair mulki ko kaarobar nahi karwa sakta.