Riyadh-Istanbul: Saudi arab aur uskay Haleef ke khilaaf Qatar aur Turkey ki nai mahaaz aarai se khittay mein nai kasheedgi ke assaar numaya ho rahay hain kyunkay jahan ek janib Saudi arab nay Qatar par kayi ek pabandiyan aed kar rkhi hain wahein ab Qatar ki mazeed madad ke liye Turkey nay naye iqdamaat par ghaur shuru kardiya hai. Saudi arab aur is ke ittihadi arab mumalik nay qareeb 2 baras se Qatar par pabandiyan Aa-ed kar rakhi hai. un tehdidat ke mansoobah saaz Saudi walii ehad Mohammad bin Salman hain aur unhon nay naka bandi khatam karne ke liye Qatar se jo mutalibaat kar rakhay hain un mein 2016 mein Qatar mein qaim ki gayi ek askari bees ko band kiye jaaney ka mutalba bhi shaamil hai lekin qatri Ameer Sheikh tamim bin hamad al sani nay deegar mutalibaat ke sath is mutalbe ko bhi mustard kar diya tha.
Turk akhbar Huriyat nay apni ek report mein likha hai ke Saudi mutalbe ke jawab mein qatri Ameer nay apne mulk mein ek nai turk fouji chowni bananay ka faisla kiya hai. nai chowni ka aaghaz rawan mausam khizaa mein kiya jayega aur is ke liye munaqidah taqreeb mein turk sad Recep Tayyab Erdogan bhi shirkat karenge. is waqt tak Qatar mein teen hazaar turk fouji mojood hain taham taaza report mein yeh nahi bataya gaya hai ke nai chowni ke qiyam ke baad mazeed kitney turk fouji Qatar bheje jayenge. akhbar nay qatri zaraye ke hawalay se likha hai ke Turkey apne ittihadi khaliji mulk mein kam az kam paanch hazaar mazeed fouji tainaat karega.
Qatar mein mazeed turk fouji tainaat kar ke Doha aur Saudi walii ehad aur unke deegar itihadiyon ko kuch wazeh paighamaat pohanchana chahtay hain. saddar Erdogan chahtay hain ke woh yeh wazeh kar denke Turkey ki kharab hoti hui muashi soorat-e-haal ke bawajood woh mashriqi wasti mein apna assar wo rasookh badhaane ka azm rakhtay hain. iske sath askari mojoodgi mein izafah khaleej faris mein kasheedgi mein izafay ke soorat mein khittay mein Turkey ke muashi mafadaat ke tahaffuz ka bhi sabab ban sakta hai. Qatar ke Ameer yeh saabit karna chahtay hain ke naka bandi un ki policies par assar andaaz nahi hogi aur woh nah to Al-Jazeera channel band karenge aur nah hi saddar Erdogan se apne taluqaat khatam karenge.
Saudi tehdidat ke baad Turkey Qatar ka ahem saathi ban kar samnay aaya aur dono mumalik nay bahami muashi taluqaat mein bhi numaya izafah kar rakha hai. dono mumalik nay somalia aur libya ke bohranon mein bhi ek dosray ke sath mil kar amli iqdamaat kiye. Qatar mein turk fojion ki tadaad mein izafah Mohammad bin Salman ko mazeed ishtial dilanay ka sabab bhi ban sakta hai. Saudi walii ehad Turkey aur Qatar par Akwan al-muslimin jaisi mazhabi tanzeemon ki himayat karne ka ilzaam aed karte hain. unka khayaal hai ke yeh dono mumalik mashriq wasti mein kayi arab badshahton ko khatam kar ke wahan islami nizaam laane ki koshish kar rahay hain. Saudi aur amarati sahebzaade is ke baraks badshahi hukmraanon ko mazeed mazboot bana kar khittay mein istehkaam laane ke liye koshan hain jis ka ek Mazhar soudan ki soorat-e-haal mein dekha gaya.
Khaliji itihadiyon ke alawa deegar arab mumalik bhi kayi barson se Tamim aur Erdogan ki kharja policies par tashweesh ka izhaar karte rahay hain. ibtida mein qareeb sabhi mumalik nay Saudi arab aur iske Khilji itihadiyon ka sath bhi diya. lekin Qatar ke khilaaf Mohammad bin Salman ke sakht tar iqdamaat se bhi arab hukmaran naraaz hain. haliya mahino ke douran marakish aur urdan ke badshahon nay Riyadh se doori ikhtiyar kar liya hai. –YTN STAFF