Hyderabad: Naye saal ki aamad ke sath ab jabkay Sankranti ke liye bhi chand haftay reh gaye hain lehaza Hyderabad se Andhra Pradesh mein apne aabadi maqam janay walay afraad ki badi tadaad ne baday pemana par buses ke tickets ki booking karli hai. AP ke Vishakhapatnam,Triputi ke sath Karnataka ke Bangloru aur Tamil Nado ke Chennai ke liye Hyderabad se janay wali buses mein reservation ka amal taqreeban mukammal hogaya hai taham Christmas aur Sankranti ke liye khusoosi buses ki fehrist Andhra Pradesh state road transport corporation ki janib se hanoz jari nahi ki gayi hai.
Jaria saal January mein RTC ke janib se Hyderabad se riyasat ke mukhtalif maqamat ke liye 5 ta 13 January khusoosi Buses chalaye jayengi. Un buses mein kiraya 50% zayed wusool kiya jayega. Ilawa azeen 3020 khusoosi buses bhi chalaye jayengi taakay musafereen Sankranti mananay ke liye apne aabadi maqam ja sakain. Corporation ko un khusoosi buses ke zareya 15 crore rupiye ki aamdani mutawaqqa hai. Is martaba bhi Hyderabad se 10 taa 15 January AP ke Vijayawada, Visakhapatnam, Tirupati, Karnool aur Rajahmundry janay ke liye advance booking ki talabb mein izafah huwa hai. –YTN STAFF