Hyderabad. Telangana State Waqf Board ka aik ahem ijlaas aaj Sadarnasheen Waqf Board Janaab Mohammad Saleem ki sadarat mein munaqqid huwa jis mein Mahboobnagar aur Sangareddy azlaa mein Waqf Board ki janib se Haj House aur Toopran mein shadi khanah taamer karne ka faislah kiya gaya hai. Mohammad Saleem ney akhbaari numaindon se baat cheet karte huwe bataya ke Waqf Board ke masaarif par Bhubaneshwar University ke mukhtalif courses mein Telangana riyasat ke 100 Muslim bachon ko dakhla dilanay ka faisla kiya gaya jahan behtareen courses chalaye jarahay hain. Unhon ney bataya ke hamaray ilm mein yeh baat aayi hai ke darjah chaharum ke mulazmeen ki had umar 65 baras hai aur woh 60-70 hazaar rupay mahana taankhuwa haasil kar rahay hain jabkay woh yahan khidmaat anjaam dainay ke muaqqaf mein bhi nahi rehtay hain. Hum ney faisla kiya hai ki is khusoos mein riyasti hukoomat se murasilat karte huwe Waqf Board mein kaam karne walay mulazmeen ki had Umar ko 60 baras tak mehdood kardiya jaye. Is khusoos mein aindah faisla kiya jaye ga. Isi terhan aayindah ijlaas mein Board ke ohdedaron ko Assistant Secretary ke ohdon par taraqqi ke masla ka bhi jayeza liya jaye ga jis ke liye aayindah hafta Zila Committee ka ijlaas munaqqid hoga. Janaab Mohammad Saleem ney bataya ke Auqafi jayidadon par najayiz qabzon ki barkhastgi ke liye aik khusoosi ijlaas wukla ke sath munaqqid kiya jaye ga. Unhon ney bataya ke Bandalaguda mein Noori Shah se mutaliq auqafi jayedad par ki gayi Registries ki barkhastgi ke qanooni pahlu ka bhi jaiza liyajaye ga chunkay is khusoos mein aik fareeq ki janib se Waqf Board ke khilaaf Urdu akhbarat mein aik notice jari ki gayi hai. ijlaas mein auqafi idaron ke liye 11 intezami Commision ki tashkeel aur teen marhale ki namzadgi ki manzoori ke ilawa do auqafi jayidadon par tamirat ke liye tamirati commission ki tashkeel ki bhi manzoori di gayi hai.