New Delhi: Hukoomat chahey laakh daaway karle lekin iske Iqtidaar mein sarkari banks ke sath dhoka dahi ke muamlay ruk nahi rahay hain jaisa ke Ek martaba phir Punjab national bank mein dhoka dahi ka maamla samnay aaya hai. Bhushan power and steel ltd ( BPSL) Nami company ney PNB mein 3800 crore rupay ka dhoka diya hai. pnb ney khud is muamlay ki tasdeeq ki hai. is muamlay ki maloomat dete hue bank ney kaha ke Bhushan power and Steel ltd ney bank Qarz mein dhoka dahi ki aur bank ke group se fund akhatta karne ko lekar apne hi bahi khatoun mein ghaban kiya hai. pnb ney dhoka dahi ki maloomat RBI ko dedi hai.
Punjab national bank ney is muamlay ki tafseelaat share bazaar ko bhi daydi hai. bank ney kaha ke foreinsic audit jaanch aur az khud notice lekar company aur iske directors ke khilaaf CBI ki FIR ki bunyaad par bank ney RBI ko 3805.15 crore rupay ki dhoka dahi ki report di hai.
pnb ney kaha ke BPSL ney bank fund ka ghaban kiya hai aur bankoun ke group se fund haasil karne ko le kar apne bahi khaton mein gadbadi ki hai. bank ney kaha ke yeh maamla NSL yani national company law authority mein zair-e-iltiwa hai.
Punjab national bank mein dhoka dahi ka yeh koi pehla maamla nahi hai. is se qabal pnb mein 13 hazaar 500 crore rupay ka dhoka samnay aaya tha. is dhoka dahi mein heeroun ke tajir Nirav Modi mulzim thehraye gaye hain. maamla manzar-e-aam par anay ke baad Nirav Modi Hindustan chodh kar faraar ho gaye they aur ab woh fil haal London ki jail mein band hain.-YTN STAFF