Mumbai : Social Media par peer ki subah se hi saree ka Trend kaafi shohrat haasil kar raha hai aur tin din guzar janay ke baad bhi kayi mashhoor wo Maroof khatoon filmi wo siyasi hastiyoun ne is twitter Trend ke tehat apni tasweerain shaya kee. dilchasp baat yeh hai ke congress ki qaumi general secretary Priyanka Gandhi ne bhi is Trend ke tehat saree Zaib tan ki hui apni ek dilkash tasweer shaya ki aur kaha ke yeh 22 saal qadeem tasweer hai.
Filmi hastiyan aksar twitter trend mein shaamil hoti rahi hain aur is martaba bhi adakara Gul panag, Renuka , aur Yami gautam ke alawa deegar ne #sareetwitter ko tag karte hue saree Zaib tan ki hui apni tasaveer shaya ki hain lekin dilchasp yeh hai ke is martaba Shivsena ki rukniat ikhtiyrar kar chukain Priyanka chaturvedi, BJP leader Nupur sharmaa, congress leather pankhari pathak, BJP leader Nikhat abbas jaisi hastiyoun ke sath sahaafat se talluq rakhnay wali Nidhi Rajdhan, Rubika Liyaqat , sakshi joshi jaisi hastiyoun ne bhi khud ko is trend mein shaamil kiya.
Is trend ne Priyanka Gandhi ko itna mutasir kiya ke unhoun ne apni tasweer bhi saree pehnay hue shaya kardi aur iske sath caption mein likha ke 22 saal qabal meri shadi ke din subah ki pooja ke douran ki tasweer. yahan qabil-e-ghour hai ke hash tag saree twitter peer ko is waqt trend karne laga jab angrezi akhbar New York times mein shaya ek mazmoon mein saree ki tareef ki gayi aur is ki tareekh par bhi roshni daali gayi.
Dilchasp baat yeh hai ke mazmoon mein ek taraf jahan yeh likha gaya hai ke saal 2014 mein BJP ki fatah ke baad saree ko kafi farogh diya gaya hai, wahein yeh bhi likha gaya ke Narendra Modi ki kamyabi ke baad se banarsi saree bananay walay bunkuroun ke masail ki taraf koi tavajja nahi di gayi. bahar haal, saree par likhay gaye mazmoon ke baad se hi twitter par saree pehnay khawateen ki taswerain khoob shaya honay lagi hain. Police mehakma se le kar samaji khidmat karne wali khawateen tak, aur adbi halqa se le kar taleem wo taleem se jari khawateen bhi khud ko is trend mein shaamil karne se nahi rok pa rahi hain. –YTN STAFF