Hyderabad : Rachakonda police ne itwaar ke roz 10 sala taalib-e-ilm ki janib se aghwa kiye gaye, jamaat-e-duwam ke ek 6 sala taalib-e-ilm Arjun ko, aghwa kiye janay ke sirf 4 ghantoun ke andar hi bacha liya.
Peer ke roz media numaindoun se baat karte hue, Rachakonda police commissionaire Mahesh M. Bhagwat ne bataya ke aghwa kar ne wala mulzim, jo Meerpet ke ek niji school mein 10 jamaat ka taalib-e-ilm tha, isne almas guda mein bhula phusla kar jamaat duwam ke taalib-e-ilm 6 sala Arjun ko aghwa kar liya aur iske waalid, jo ek software company mein nokari karte hain, ko phone kiya, aur 3 laakh rupiye talab kiya.
Mazkurah waqea itwaar ki seh pehar 2:30 bajey ke qareeb hua. jab bacha coaching ki classes mein shareek honay ke baad ghar wapas araha tha ke mulzim ne usay pakad liya, aur isne ladke ko ek sath khelnay ke liye almaas guda ke apne ghar le janay ki lalach diya aur is ladke ke waalid ka phone number liya. iske baad isne raju ko phone karkay bataya ke iske betay ko aghwa kar liya gaya hai, aur usne bachay ki rihayi ke liye 3 laakh rupay ki raqam ka mutalba kiya. sath hi usay yeh mutnabba bhi kiya ke agar us ne police ko is ki ittila di to iska beta mara jayega.
Ladke ke waalid ne is se iltija ki ke woh bachay ko takleef na pohnchaye aur 1.5 laakh rupaye denay ki peshkash ki, lekin mulzim ne saudey baazi ki aur aakhir-kaar 25,000 hazaar rupaye advance baqi ki raqam check ke zareya manga. Raju ne police ko alert kar diya, jisne mushtaba shakhs ka suraagh lagaya aur shaam 7 bajey ke qareeb usay almaas guda se pakad liya aur is ladke ko bacha liya, jisay mulzim ne qareebi mandir mein bitha kar rakha tha.
Shikayat masool honay per meerpet police ne muqadma darj karkay tafteesh ka aaghaz kar diya. fori tor par police ne ek khusoosi team tashkeel di aur Intelligence ke zareya mulzim ki nishandahi ki aur mulzim ko tehweel mein le liya. Poch tach ke douran mulzim ne jurm ka aiteraaf karliya aur police ko mandir ka pata batadiya, jahan se bachay Arjun ko bachaya gaya. –YTN STAFF