Dubai: Emirates Airlines ki janib se mehdood parwazein chalanay ka aaghaz peer se hoga aur ye mulk mein muqeem un ghair mulkioun ke liye mukhtas hongi jo apne watan jana chahtay hain. Dubai mein shehri hawabazi Authority ke sarbarah Ahmed bin Saeed Al Maktoum ne kaha hai ke faisla huva hai ke Corona ke baais International parwazein band honay se mutasir honay walay mulk mein muqeem Iqama holders ya Visit par aeye huve ghair mulkioun ko pehlay safar ka mauqa diya jaye ga.
Unhoun ne kaha hai ke parwazoun ki juzwi bahaali ki tafseel abhi tey nahi ki taham jald hi parwazoun ka naya Schedule jari hoga. Unhoun ney kaha hai ke Emirates Airlines International parwazoun ki bahaali ki khwaahan hai aur juzwi tor par is ka aaghaz karne ja rahi hai. Shehri hawabazi Authority ke sarbarah ney mazeed kaha hai ke International parwazoun ki juzwi bahaali ke sath hum apne amlay aur musafiroun ki salamti ko yakeeni bananay ke liye har terhan ki tadabeer ikhtiyar karen ge. Wazeh rahay ke deegar aalmi huva baz companiyoun ki terhan Emirates Airlines sameit mulk ki tamam fazai companiyoun ne Corona ke baais International parwazein moattal kar rakhi hain. –YTN STAFF