New Delhi: Saddar e jamhooria Ram Nath Kovind Mulk ke paanch riyaston ke liye naye Governors ka itwaar ko elaan kiya. Kalraj Mishra ko Himachal Pradesh se Rajasthan muntaqil kiya gaya hai, jahan woh Kalyan Singh ki jagah naye Governor banaye gaye hain. BJP rehnuma Bandaru Dattatreya ko Kalraj Mishra ki jagah Himachal Pradesh ka naaya Governor banaya gaya hai.
Bhagat Singh Koshyari ko Vidyasagar Rao ki jagah Maharashtra ka naya Governor muqarrar kiya gaya hai. wahein Kerala mein, Arif Mohammad Khan ko naya Governor banaya gaya hai, pehlay P Sathasivam yahan ke governor thay. Dr Tamilisai Soundararajan ko ESL Narasimhan ki jagah Telangana ka naya governor banaya gaya hai.