Hyderabad : Mulazmat anjaam dene walay professionals aur engineers ke alawa UG mein taleem haasil kar rahay talba jo-ke apni salahiyaton ko farogh dena chahtay hain isi ke paish-e-nazar Osmania university ne apne tarz ka pehla data science PG diploma course muta-arif kiya hai. Osmania university ki janib se muta-arif kiya janay wala yeh course darasal is maqsad ki takmeel karta hai ke jo talba aur khawahish mand afraad data science mein apni salahiyaton ko farogh dainay ke alawa mulazimaton mein taraqqi karna chahtay hain un ki zaroriat ko poora kar sakay.
Is course ke nisaab ki tayari mein mein industry ke mahireen ki khidmaat haasil ki gayi hain aur nisaab ki tayari mein market ki maang aur mustaqbil ki zaroriat ko ahmiyat di gayi hai. is khusos mein izhaar-e-khayaal karte hue Osmania university ke voice chancellor professor M.Ram chandram ne kaha hai ke yeh online course darasal salahiyaton ke farogh aur mulazimaton ke husool ki munasbat se tayyar kiya gaya hai. mulaazmaten anjaam dainay walay aur zair taleem talba is course mein dakhla ke ahal honge aur jo afraad is course mein dakhla lenge inhen classes ke alawa paractical bhi karwaye jayenge.
Engineering faculty ke alawa market ke mahireen bhi talba ki classe se laingay jabkay university ki janib se pehlay hi chand video asbaq bhi tayyar kar liye gaye hain. yeh programme professor F Ram Reddy center for distance education ke tehat semester ki asaas par faraham kiya ja raha hai aur umeed ki ja rahi hai ke is programme ka aaghaz augst ya mah September mein hoga. unhon ne mazeed kaha ke university grant commission ne is course ke mutaliq chand tafseelaat talabb ki hain jis par hum ne tafseeli report rawana kar di hai aur jald hi UGC se is ki Musalmah masool hojayegi.
Is ke alawa university ne distance education mein do naye courses bhi muta-arif kiye hain jo ke M.A public administration aur B.com computer application hain. aindah taleemi saal se distance education mein bhi tamam courses semester ki asaas par faraham kiye jayenge. is waqt 26 programs ki taleem di jati hai jis mein se sirf MBA aur PG diploma & computer application hi woh do course hain jo-ke semester ki asaas par diye jarahay hain. –YTN STAFF