New Delhi : Congress ne Note bandi ke baad puranay notes ke ghair qanooni tareeqa se tabdeel kiye jane ka ek aur inkeshab karte hue daawa kiya ke ab saabit hogaya hai ke note bandi mulk ka sab se bada scam hai aur is ke talluq se jo haqayiq samnay arhay hain unki wasee tehqiqaat honi chahiye .
Congress ke senior leader Kapil Sibbal ne press conference mein ek sting dekhaya aur daawa kiya ke Gujrat mein BJP daftar se mili hidaayat ke bunyaad par 31 decemeber 2016 ke baad 500 aur 1000 rupay ke puranay notes ki kis tarha ghair qanooni tareeqa se tabdeel kiya gaya tha. is kaam mein BJP ke leadron ke sath bank ke sabkadosh ohdedar aur police hukkaam bhi shaamil they .
Isi khufia karwai mein yeh bhi inkishaaf hua hai ke puranay notes ki tabdeeli ke douran gadbadi karne ke shuba mein kabini secrtait mein tainaat ek mulazim ko bar tarf kiya gaya. yeh mulazim 5 saal se apni khidmaat day raha tha lekin June 2017 ko usay achanak mulazmat se hataya jata hai. hukoomat ko batana chahiye ke is mulazim ko kis bunyaad par hataya gaya aur kiya usay hataane se pehlay wajah batao notice diya gaya tha. agar notice diya gaya tha to is mein kiya likha tha, is ka bhi inkishaaf hona chahiye . Congress ke leader ne kaha kay notes ki mansookhi ke baad jo inkishafaat hue hain un se wazeh hai ke puranay notes ko ghair qanooni tareeqa se badlay jany ka kaam BJP ke baday leadron ke isharay par hua hai. sting mein BJP daftar mein tainaat ek karkun BJP ke saddar Amit Shah ki tasweer lehratey hue keh raha hai ke darnay ki baat nahi hai, 100, 200 ya 500 crore jitne bhi hain sab badlay jayenge aur kisi ka baal bhi baka nahi hoga .- YTN STAFF