Dubai: Captain Dinesh Karthik ki sarparasti mein Kolkata Knight Riders ( KKR ) apni guzashta kamyabi se pur josh charshumbe ko IPL13 ke apne aglay match mein na qabil taskheer Rajasthan Royal ke samnay ek zabardast Challenge pesh karne ke iraday se utre ga. Kolkata ko Tournament ke pehlay match mein difai Champion Mumbai Indians se shikast hui thi jab ke is ne pichlle match mein Sunrisers Hyderabad ko yaktarfa andaaz mein 7 wickets se shikast di hai. Is se qabal Rajasthan ne aakhri match mein Chennai Super Kings aur Kings Xi Punjab ko shikast di hai. Kolkata ki team 2 Matche mein ek shikast aur ek kamyabi ke sath chhatay number par hai jabkay Rajasthan ki team dono match jitti hai aur points table mein 4 points ke sath Delhi Capitals ke baad dosray number par hai.
KKR ka muqaabla Rajasthan jaisi mazboot team ke challenge se hoga jis ne ab tak Tournament mein umdah karkardagi ka muzahira kiya hai. Rajasthan Royal ne kamyabi ke sath Punjab ke khilaaf 223 runs ke himaliyai nishana ka kamyaab aur Record taqub kiya hai. Is kamyabi ki wajah se Captain Stevin Smith ki team ka hosla bohat buland hai jisay Kolkata ko maat dena hogi. Pichlle match mein Rajasthan ke liye Jos Butler ke ilawa dosray Top order batsman ne umdah karkardagi ka muzahira kiya tha aur haari hui baazi apne naam ki thi. KKR ke muqaabla Sanju Samson se hoga jis ne ab tak dhamaka khaiz batting ki hai. Samson ne Chennai ke khilaaf 74 aur Punjab ke khilaaf 85 runs banaye aur woh dono matchon mein Man Of the Match rahay.
Captain Smith apni karkardagi se team ko Rajasthan ke liye musalsal mutharrak kar rahay hain aur aakhri match mein un ki Samson ke sath mazboot shiraakat thi. Rajasthan Royal ki janib se Punjab ke khilaaf middle order batsman Rahul Tewatia ki dhamaka khiz karkardagi na qabil yaqeen thi aur yeh Kolkata ke liye khatray ki ghanti hai. Bulter IPL apne pehlay match mein nakaam rahay. Unhoun ne Punjab ke khilaaf 4 runs banaye aur tawaqqa ki jaye gi ke woh aglay match mein behtar karkardagi deikhein ge.