Hyderabad: Ameerpet Metro Rail Station par honay walay ajeeb-o-ghareeb haadsay ki pehli barsi ke mauqa par ab Moosapet Station ki dewaron mein padney wali daraaron ki chonkanay wali video viral hogayi jis ke bad Metro Rail musafir mohtaat honay par majaboor hogaye hain.
in dinon hum Pole aur Flyover ke iftitah se qabal ya is ke chand din baad hi munhadim honay ke baray mein suntay hain. Hum yeh achi tara jantay hain ke is terhan ke hadsaat imaarton ki taamer mein thikidaroun ki bud unwani ki afsoosnaak akkaas hotay hain, Jo intizamia mein budanwan anasir ke sath mil kar tamirati kaam ko naaqis banatay hain.
Awam Moosapet Station se jahan taq mumkin ho sakay guraiz kar rahay hain kyunkay inhen khadsha hai ke un dinon bhaari barish ko dekhte huve phati dewaron ke kuch hissay kisi bhi lamhay gir kar tabah ho satke hain. Jin logon ney station mein mein darare dekhi hain woh tamirati miyaar ke baray mein shukook-o-shubhat ka izhaar kar rahay hain. Yaad rahay ke 22 September 2019 ko Metro ke Ameerpet Station ka Concrete girnay ke baad 24 sala khatoon ki mout hogayi thi. Woh is din barish se panah lainay ke liye sirf Station mein daakhil hui thi. Ek saal ke arsa ke baad ab jabkay shehar mein musalsal baarisho ka silsila jari hai to is mein deewar girnay aur chhat girnay ki daastaa’n shayad awam ka intezaar kar rahi hai.