Karachi: World cup 2019 ke liye Pakistan ney 15 rukni squad ka elaan kardiya gaya jis mein fast bowler Mohammad Amir jagah bananay mein nakaam hogaye. Champions trophy ke final ke baad se Mohammad Aamir career ki bad tareen form mein hain aur 27 sala bowler is douran 14 matchon mein 101 overs ki bowling mein 92.60 ki osat se sirf 5 wickten le sakay .
Pakistani team ke cheif Selector Inzamam ul Haq ney kaha ke England ke douray ke liye do izafi khiladion ko rakha gaya hai jin mein Mohammad Aamir aur Asif Ali shaamil hain. yeh dono England ke khilaaf ODI aur T20 series mein Pakistani team ki numaindagi ke liye dastyab honge aur is series mein unki karkardagi ko dekhnay ke baad world cup ke hatmi squad mein shamoliat ka faisla kiya jayega. world cup se qabal Pakistani team England ke khilaaf ek T20 aur paanch ODI matchon par mushtamil series khailay gi .
Inzimam ney world cup ke liye noujawan fast bowler Mohammad Hasnain ko tramp card qarar diya jo 150 Km fee ghanta ki raftaar se bowling karne ki salahiyat rakhtay hain. Hasnain ko muntakhib karne ke sawal par unho ne kaha ke yeh hamaray paas surprize package hai jo bowler 150 Km fi ghanta ki raftaar se gend kar sakta hai aur yeh kisi bhi waqt team ko match jitwa sakta hai .
world cup ke liye Pakistani team un khiladion par mushtamil hai . Abid Ali, Babar Azam, Faheem Ashraf, Fakhar Zaman, Haris Sohail, Hasan Ali, Imad Wasim, Imam-ul-Haq, Junaid Khan, Mohammad Hafeez, Mohammad Hasnain, Sarfaraz Ahmed (Captain/wicket-keeper) Shadab Khan, Shaheen Shah Afridi, Shoaib Malik. – YTN STAFF