Hyderabad : Congress ke senior rehnuma aur sabiq wazeer Mohammad Ali Shabbir ne peer ko road transport corporation ke hadhtaal karne walay 48,533 mulazmeen ko Bar-khast karne ke elaan par wazeer-e-aala K.Chandrashekhar Rao ki jam kar sarznish ki.
Peer ke roz Kamareddy bus depot mein muzahira karne walay RTC mulazmeen se khitaab karte hue Shabbir Ali ne kaha ke ”KCR hukoomat ne RTC mein 48 mulazmeen ki bhi taqarruri nahi ki, lekin woh ek hi jhatkay mein 48,000 hazaar se zayed mulazmeen ko Bar-khast karne ka elaan kiya.
Is faislay ko har-giz Bar-daasht nahi kiya jayega, kyunkay RTC amlay ko jamhoori haq hai ke woh ehtijaj karen aur yahan tak ke woh apne darina mutalibaat ki takmeel ke liye hadhtaal bhi karen.
Shabbir Ali ne kaha ke congress party RTC kaarkunoun ke mutalibaat ki takmeel tak unki madad karegi aur is baat ko yakheeni banayenge ke ek bhi mulazim apni mulazmat se mahroom na ho.
Congress leader ne nishandahi ki ke Tamilnadu ki is waqt ki wazeer-e-aala Jaya lalita ne 2003 mein 1.70 laakh se ziyada RTC mulazmeen ko Bar-khast kardiya tha, taham, is faislay ko adalat ne ulta kardiya aur tamam mulazmeen ko bahaal kardiya gaya. unhon ne kaha ke TSRTC mulazmeen ki taraf se uthaye jaane walay tamam mutalibaat bilkul jaaiz hain aur un mutalibaat ko poora kiya jana chahiye.
Unhon ne riyasat ki tamam unions se kaha ke woh RTC kaarkunoun ko taawun faraham karen, kyunkay KCR ne ek hi jhatkay mein hazaroun mulazmeen ko barkhast karkay ek badi misaal qaim ki hai. agar ab bardasht kiya gaya to KCR tamam mehkamoun aur corporations ke mulazmeen ke sath bhi aisa hi sulook karenge. –YTN STAFF