Mohali : Hindustani cricket team Dharamshala mein pehla muqaabla barish ki Nazar honay ke baad Mohali mein junoobi Africa ke khilaaf series ke dosray 20-20 kamyabi ke husool ke maqsad ke sath kal maidan mein utregi aur is muqablay mein sabhi ki nigahein team ke nojawan khiladion ki karkardagi par markooz hogi.
Hindustan aur Junubi Africa ke darmiyan 3 T20 matchon ki series ka pehla match poori tarhan se barish ki Nazar honay ke baad dosra match ahem hogaya hai kyunkay jo bhi is mein kamyaab hoga to iske paas Sabqat haasil karne ke sath series per qabza karne ka bhi behtar mauqa rahayga.Hindustan is se pehlay west indies doray par T20 series 3-0 se apne naam kar cuhka hai.
Yeh series captain Virat kohli aur team intizamia ke liye world cup ki team talaash karne ka bhi acha mauqa hai jo aglay saal Australia mein hoga aur iske liye abhi se tayari aur mazboot team tayyar karne ka yeh behtareen mauqa hai.
Iske paish-e-nazar intizamia ney mojooda series mein kayi naye cheharon ko mauqa diya hai jin mein Navdeep saini, deepak Chahar , Washington sunder aur khalil ahmed khabil-e-zikar hain. umeed hai ke captain kohli dharamshala ki hi team ko baghair kisi tabdeeli ke mohali mein bhi utaringe.
All rounder Hardik pandya bhi team mein wapsi kar rahay hain aur unki bowling ke sath team teen spinners ko mauqa day sakti hai. wahein pandya lower order mein behtar batsman bhi hain.
Bowling ke liye Hindustan ke paas kayi mutabadil khiladi mojood hain. Jasprith bumrah ko aaraaam diya gaya hai taakay naye khiladion ko mauqa diya jasakay. wahein Bhuvneshwar kumar bhi mojooda series ka hissa nahi hain, aisay mein fast bowling ki nai jodi ko jo saini, deepak aur khalil par mushtamil hogi aur unhen apni salahiyat dikhaane ka mauqa mileyga. –YTN STAFF