New Delhi : America ke Texas ke shehar Houston mein munaqidah ”Howdy Modi“ programme mein hazaron hindustani nazaad logon nay shirkat ki. is mauqa par Amrici sadar Donald Trump ko dekh kar aisa lag raha tha ke woh aglay saal honay ja rahay sadaarti intikhabaat ke modh mein hain aur wahan aaye hazaron hindustaniyon ko lubhaney ki koshish kar rahe hai.
Is mauqa par wazeer-e-aazam Narendra Modi nay lok sabha intikhabaat mein istemaal kiya gaya unka naara ”ab ki baar Modi sarkar “ki tarz par ”ab ki baar Trump ki sarkar “ ka naara lagaya.
Amrici sadar Donald Trump ke haq mein wazeer-e-aazam Narendra Modi ki janib se naaray baazi ko Hindustan ki kharja policy ki khilaaf warzi qarar dete hue congress nay kaha ke is se guraiz karna chahiye tha. Senior congress leader Anand Sharma nay sahafion ko bataya ”hamari Hindustan aur America ke darmiyan strategic shiraakat hai, jo do Tarfah hai, jiski hum himayat karte hain. magar Modi ka is tarhan wahan naaray baazi karna Hindustan ki kharja policy ki tauheen hai, is se bacha ja sakta tha.
Unhon nay kaha ke Hindustan ki kharja policy ke baare mein woh ek aizazi convention hai. jab hum ghair mulki hukoomaton ke sath hotay hain to, Hindustan ke sadar ya wazeer-e-aazam unki sir zameen par hotay hain, to hum unki mulki intikhabi siyasat mein hissa nahi letay hain. lekin hum nay dekha ke wazeer-e-aazam Narendra Modi nay ”ab ki baar Trump sarkar ka naara lagaya. unhon nay kaha ke Narendra Modi wahan hamaray wazeer-e-aazam ke tour par hain, na-ke donald Trump ke star par chark ke tor par. –YTN STAFF