New Delhi: Hindustan mein hujume tashadud ke barhatay huwe waqhiyat ke khilaaf 2 din qabal hi Wazeer e Azam Narendra Modi ki mukhalifat jahan filmi, samaji, siyasi, sahafti o karobari 49 shaksiaat ney khula maktoob likha tha wahein aaj 62 afraad ney Modi ki himayat mein apne muktubaat rawana kiye hain aur jin afraad ney mukhalifat mein maktoob rawana kiya tha un par bhi shadeed tanqeed ki hai. Hindostan bhar ki ahem shaksiaat ki janib se Wazeer e Azam ke naam likhay gaye khulay khat mein Narendra Modi se tashadud ke waqhiyat ko rokney ke liye sakht iqdamaat karne ka mutaleba kiya gaya tha.
Tafseelaat ke mutabiq mazkoorah shaksiaat ki janib se likhay gaye khat mein Wazeer e Azam se mutaleba kiya gaya tha keh woh Mulk bhar mein Jay Shree Ram ke naaray se mutaliq tashadud ke waqhiyat ki rok thaam karen, jin mein musalmanoon sameit nichli zaat ke hindoon ko nishana banaya ja raha hai. Ahem shaksiaat ki janib se likhay gaye khulay khat mein National Crime Record Bureau (SCRB) ke adaad o shumaar bhi shaamil kiye gaye they aur kaha gaya ke sirf 2016 mein Hindustan bhar mein 816 daliton par hajhoom ney tashadud kiya.
Narendra Modi ke naam likhay gaye khat mein halaan ke unhon ne Wazeer e Azam ki janib se tashadud ki muzammat se mutaliq Parliament mein diye gaye bayanaat ki tareef bhi ki gayi taham unhon ney mutaleba kya ke baat sirf muzammat karne se nahi chalay gi. Khulay khat mein un shaksiaat ney haugume tashadud ke barhatay huwe waqhiyat par tashweesh zahir ki thi aur kaha tha ke Jay Shree Ram ke naaray ke tehat kiye jaane walay is tashadud ke sangeen nataij nikleen ge, is liye aisay waqhiyat ko roknay ke liye thos iqdamaat uthaye jayen.
49 shaksiaat ki janib se Narendra Modi par tanqeed kiye jaane aur Mulk bhar se tashadud ko khatam karne ke mutalebe ke baad ab tak deegar 62 shaksiaat ney Hindustani Wazeer e Azam ki himayat mein khula khat likha hai. 49 Shaksiaat ki janib se Narendra Modi par tanqeed kiye jaane ke baad ab 62 film sazoon, samaji rehnumaon aur karobari shaksiaat ney khula khat likh kar Wazeer e Azam ki tareef ki hai. Tafseelaat ke mutabiq Narendra Modi ki tareef karne wali 62 shaksiaat mein adakara kangana Ranaut, Filmsaaz Madhur Bhandarkar, Dancer Sonal Mansingh, Naghma Nigaar Prasoon Joshi aur mosiqaar pandit vishwa Mohan Bhatt sameit deegar shaksiaat shaamil hain. Narendra Modi ki himayat mein khat likhnay wali shaksiaat ney Wazeer e Azam ke khilaaf khat likhnay walon par shadid tanqeed karte huwe inhen bikaoo qarar diya.
Wazeer e Azam ki himayat mein khat likhnay wali shaksiaat ney mukhalifat mein khat likhnay walay afraad ke khat ko haqeeqat se balatar qarar dete huwe daawa kiya ke Hindustan mein lasani tashadud ke waqhiyat nahi ho rahay. Narendra Modi ki himayat mein khat likhnay walay afraad ke mutabiq jab Manoj Baghi masoom logon ko nishana banatay hain to yeh log khamosh rehtay hain aur ab bol rahay hain. 62 shaksiaat ney 49 shaksiaat ke khat mein bayan kiye gaye tashadud ke waqhiyat ko jhoota aur propoganda qarar diya. Narendra Modi ki himayat karne wali shaksiaat ney Wazeer e Azam ki mukhalifat karne walon ko bikaoo qharar dete huwe inhen bekar bhi qarar diya aur kaha ke aaj kal un logon ke paas koi kaam nahi, is liye mann gharat batiyaa kar rahay hain. Yaad rahay ke Hindustan mein guzishta 5 saal se haugume tashadud ke waqhiyat mein izafah dekhnay mein aaya hai. Aisay waqhiyat mein ziyada tar aqliati afraad yani musalman, isaai aur nichli zaat ke hindvoon ko nishana banaya ja raha hai.