Hyderabad. Telangana State Waqf Board ney Marriage Certificates ki fees mein 50% izafah kardiya hai. Marriage/Talaq, Qhula ke Certificates ki fees ko 200 rupay se badha kar 300 rupay kardiya hai jabkay yahi Certificate Tatkal ke tehat jari karne ki fees ko 300 rupay se badha kar 400 rupay kardi gayi hai. Sadar Nasheen Waqf Board Janaab Mohammad Saleem ney aaj Hajj House Nampally mein waqay Waqf Board ke headquarters mein Quzath Section ka muayina kiya jis ka baad tazaeen e nau aaj iftetah amal mein aaya. Unhon nay bataya ke Passport Office ki tarha yahan bhi Tatkal ke tehat darkhwaston ke adkhal aur ijrayi ke liye alahda counters rakhay gaye hain. Awaam ki sahoolat ke liye na sirf printes ka izafah kiya gaya hai balkay amlah bhi badhaya gaya hai. Unhon ney bataya ke Tatkal scheme ke tehat daakhil ki janey wali darkhwaston par Certificate usi din jari kar diye jayen ge jis se khaas kar azlaa se anay walay logon ko faida hoga. Isi tarha aam zumra ke tahet daakhil ki janey wali darkhwaston par bhi dosray din hi Certificates jari kardey ye jayen ge. Telangana Waqf Board ney tabdeeli mazhab ke Certificates ki ijraayi masdood kar di thi taham ab is ki bhi ijrayi amal mein layi jarahi hai.