Hyderabad : Hyderabad ke mashhoor ilaqay Lakdi-ka-pul ko munfarid aur anokhay andaaz mein khubsurat bananay ka faisla kiya gaya hai. GHMC ke zareya junction development programme ke tehat Lakdi-ka-pul ke petrol pump jo ke khairtabad se Masab tank tak ka faasla hai yahan phooloun ke darakhtoun se khoubsurti ka project mukammal kiya jayega aur is khubsurat banaye jaaney walay hissa mein kuch hissa un logoun ke liye bhi mukhtas kardiya jayega jo ke khush gawar maqamat par photos lena pasand karte hain.
Is tarhan Lakdi-ka-pul ke is naye aur khubsurat andaaz ke ilaqay mein awam selfies le sakenge. is zimn mein izhaar-e-khayaal karte hue khairtabad zonal commissionaire Musharraf Ali Farooqi nay kaha ke yeh junction jo ke khubsurat junction ke project mein tabdeel kiya ja raha hai is par 18 laakh ke masarif bardasht kiye jayenge aur yeh do haftoun mein paye takmeel ko pohanch jayega.
Is model ko steal frame aur deegar ashya ke istemaal se khubsurat banaya jayega. lekin yeh dekhnay mein lakdi ka frame hi dikhayi dayga jo ke is junction ke naam ke aitbaar se deekhaee bhi dayga. is Lakdi-ka-pul ko khubsurat junction mein tabdeel karne ke project ki takmeel ke baad awam se unka rad-e-amal haasil kiya jaye ga aur haasil shuda maloomat ki bunyaad par shehar ke deegar junction ko khubsurat aur jaazib nazar banaye jaaney ke iqdamaat kiye jayenge. –YTN STAFF