Hyderabad: Telangana ke wazeer baldi nazam-o-wansaq Information Technology KT Rama Rao ne Ambulance gadiyon ko jhandi dikhayi jis ka elaan qabal azeen un ki saalgirah ke mauqa par party ke leaders ne kiya tha. Un asri Ambulance gadiyon ka maqsad corona ke mutasireen ki muntaqili ke liye behtar khidmaat faraham karna hai. Ye taqreeb camp office mein munaqqid ki gayi jis mein KT Rama Rao ki ahliya, Dukhtar ke sath sath wazeer-e-sahet E Rajender aur hukmaran jamaat ki deegar leaders ne bhi shirkat ki.
Mister Rao jo Covid-19 ke mareezon ko behtar tibbi khidmaat faraham karne ke liye agay aaye hain ne is par musarrat ka izhaar kiya. Wo asri aur behtar sahet ki khidmaat ki peshkash ke liye sargaram rehtay hain. Rao ne qabal azeen mehakma sahet ke ohdedaron ko corona ke mareezon ki behtar dekh bhaal ki hidaayat di thi jo mukhtalif Hospitals mein zai-e-elaaj hain. Beshtar tanzeemen aur afraad is silsila mein wazeer KT Rama Rao ke jazba ko dekhnay ke baad Ambulance gadiyon ko faraham karne ke liye agay aaye hain. Is mauqa par wazeer-e-sahet E Rajender ne nishandahi ki ke hukmaran jamaat TRS ke beshtar leaders ne KT Rama Rao ki saalgirah ke mauqa par gift Smile Programme ke tehat un gadiyon ka tohfa diya tha jin mein se 6 gadiyon ko aaj jhandi dikhayi gayi.