Amravati. Chief Minister Andhra Pradesh Mr. N Chandra Babu Naidu ke farzand o General Secretary Telugu Desam Party Mr. Nara Lokesh ney kaha ke karguzaar Chief Minister Telangana o Sadar TRS Mr. K. Chandrashekhar Rao ney Assembly ki tahleel ke sath hi umeedwaron ka elaan karte huwe badi ghalti ki hai. Mr. Lokesh ney kaha ke Mr. Chandrashekhar Rao faisla saazi mein ujlat baz saabit huwe hain. Unhon ney kaha ke Mr. Chandhrashekhar Rao ki janib se jari kardah umeedwaron mein kayi umeedwaron ko aawam ki narazgi ka saamna hai. Intekhabaat mein nisf se zayed umeedwaron ko nakami ka monh dekhnaa pade ga. Telangana riyasat mein intekhabaat mein Telugu Desham Party ke hissa lainay se mutaliq kiye gaye istefsaar par Wazeer Information Tecnology Mr. Lokesh ney kaha ke is khusoos mein Party munasib faisla kere gi. Unhon ney yeh ishara bhi diya ke un ki Party zaroor Telangana Assembly intekhabaat mein hissa le gi. Samjha jata hai ke Telugu Desham Party, Telangana ki tamam Assembly nashiston par apne umeed waar khada kar ney ki bajaye makhsoos nashiston par hi apne umeedwaar maidan mein utaarey gi. Mutahidda Andhra Pradesh ki taqseem ke baad Telangana mein Telugu Desam Party ka dhancha kaafi kamzor hogaya hai. Party se wabsta kayi ahem qaideen ney party ko khirbad kehte huwe Telangana Rashtriya Samiti ya phir doosri siyasi partiyon jaisay Congress aur BJP mein shamouliyat ikhtiyar karli hai. Party mein ab aisa koi chehra nahi hai jo Telangana mein maqbool aam ho. Telugu Desam Party sarbarah Mr. Chandra Babu Naidu ko itni fursat nahi hai ke woh apni riyasat ke umoor ki anjaam dahi ko chod kar Telangana mein intekhabi muhim chalaye. Hatta ke Mr. Lokesh bhi Telangana mein ziyada maqbool nahi hain. Agar Telangana mein Telugu Desam Party kuch karna chahti hai to usay anjahani N.T Rama Rao ke pote film adakar Jr.NTR par hi takiya karna pade ga aur shayed woh bhi Telangana mein intekhabi muhim chalanay se ziyada dilchaspi nahi rakhtay.