Srinagar : Waadi Kashmir mein guzashta 2 mah se jari namsaad halaat aur ghair yakheeni sorat-e-haal ne senkron nojawanon ko rozi roti kamanay ke liye apne darina peshon se kinara kashi karkay dosray peshe ikhtiyar karne par majboor kardiya hai.
Waadi mein guzashta dhai mah se jari namsaad halaat ki wajah se senkdon nojawan jo mukhtalif facotires, kaarkhanon ya dukanon par kam karte they, be-rozgaar hogaye hain.
Tasdeeq Ahmed Nami ek driver ne kaha ke mojooda halaat ne inhen driver se ek tarkhan banadiya. mein peshe se ek driver tha aur apni hi gaadi chala kar rozi roti kamata tha lekin 5 augst ko jab yahan sab kuch thap hogaya aur ek mah ke baad bhi jab halaat theek honay ki koi soorat nazar nahi aayi to mein apne ek dost jo tarkhan hai, ke sath kaam par chala gaya is tarhan kuch paisay kama kar ahal-e-khanah ki kifalat ki Sabeel hogayi. Tassaduq Ahmed ne mazeed kaha ke agarchay mein mazdoori karkay ahal-e-khanah ka pait palta hon lekin gaadi ka jo bank qarza hai iski adaigi ki koi Sabeel nahi hai aur agar woh ada nahi kiya to mujhe zarayi arazi farokht karna padegi.
Imdaad Ahmed Nami ek salesman ne kaha ke halaat kharab honay ke baad hi mere dukaan maalik ne meri chhutti kardi aur mein ab mazdoori karkay roti kamata hon. mein ek dukaan par kayi barson se sales mean ke bator kaam karta tha aur 4 paisay kama kar apne Umar Raseedah walidain aur bachon ko palta tha lekin jab halaat kharab hue to dukaan maalik ne meri chhutti kardi kuch dinon ke intzaar ke baad mein ne mazdoori karna shuru ki taakay aamdani ki koi intizam hosakay.
Shaukat Ahmed Nami ek dukandaar ne kaha ke mojooda halaat ke baais mein dukandaar se pheri wala ban gaya. meri dukaan mein market mein hai, namsaad halaat ke baais woh musalsal muqafl hai, jab ghar mein faqon ki nobat aayi to mein ne maal ko gadi mein utha kar muhalloun mein bechna shuru kiya jis se mein kuch kamanay ke Laiq hogaya aur faqon ki nobat tal gayi.
Ek wholsale dukandaar ne apna naam makhfi rakhnay ki khwahish zahir karte hue kaha ke mojooda halaat ke paish-e-nazar mein aali-shaan dukaan ke bajaye patri par maal bechnay par majboor hogaya hon. meri srinagar mein aik aalishaan dukaan hai mein garam malbosaat ka wholeseller hon, meri dukaan par parchon dukandaron ka din bhar Tanta bandha rehta tha lekin halaat kharab honay ki wajah se dukaan band hai, aamdani ka koi dosra zareya bhi nahi hai jiski wajah se ghar mein iqtisadi halaat kaafi kharab hue to phir mein ne patri par maal bechna shuru kiya jis se kisi hadd tak ghar ka guzaraa honay laga. unhon ne mazeed kaha ke mein ne kisi bhi sales man ki chhutti nahi ki woh bhi patri par maal bechnay mein meri madad karte hain aur mai lagataar unki maali kifalat karta hon.
ek nojawan ne naam na zahir karne ki khwahish zahir karte hue bataya ke unko sri nagar ke muzafati ilaqa rangret mein waqay ek compane mein haal hi mein nokari mili thi lekin 5 augst ko compane ki khidmaat band honay ki wajah se woh ab mazdoori karne lagey hain. unhon ne kaha mujhe ek compane mein ek achi nokari mili thi. 5 augst ke baad se is compane ki khidmaat band hain. ab mein mewa baagaat mein saib ki packing karkay rozi roti kamata hon. Qabil-e-zikar hai ke waadi mein 5 augst se maloomat zindagi badastoor darham wo barham hain. –YTN STAFF