Mumbai : Maharashtra ki ek university mein 6 talba ko bahar ka rasta dikha diya gaya. is karwai ke baad ek hungama barpaa hota nazar aaraha hai. darasal Vradha waqay Mahatma Gandhi bain ul aqwami hindi university intizamia par ilzaam hai ke bahujan samaaj party ke baani Kanshi Ram ka yom-e-wafaat mananay ki wajah se un talba ko nikala gaya hai, lekin university intizamia ne kaha hai ke campus ke kuch qawaneen wo zawabit hain jinki khilaaf warzi ki wajah se un talba ke khilaaf karwai ki gayi hai.
Is silsilay mein talba ne kaha hai ke unhon ne koi qanoon nahi todha, balkay Kanshi Ram ko yaad karne aur Wazeer-e-Azam narendra modi ko khat likhnay ki wajah se unhein university se nikala gaya hai. jin talba ko university se nikala gaya hai unke naam chandan Saroj ,Rajnesh, Vibho pamplekar kumar ambdkar, rajesh yadav sarthi, niraj kumar aur pankj kumar hain. yeh sabhi ya to darj-e-fehrist tabqaat se talluq rakhtay hain ya phir pasmandah tabqa se hain.
University ahata mein Kanshi Ram yadgar taqreeb munaqqid kiye janey ke baarey mein talba ne kaha hai ke jab university ahata mein gandhi jayanti manayi jasakti hai to phir Kanshi Ram ko yaad kyun nahi kiya jasakta? is ke sath hi unhon ne yeh bhi kaha ke intizamia ki ijazat se university ahata mein firqa parast RSS ke marakiz qayam ho saktay hain to phir bahujan leader Kanshi Ram ko yaad karne ke liye programme kyun nahi munaqqid kiya ja sakta?
University se nikalay gaye naraaz talba ne intizamia par ilzaam aaed kiya hai ke pasmandah zaat se taaluq rakhnay ki wajah se unhein nishana banaya ja raha hai. sabhi 6 taalib-e-ilmoun ne is Daleel ko sahih saabit karne ke liye ek poster bhi shaya kar taqseem kya hai jis mein unke naam ke neechay yeh bhi likha hua ke woh kis tabqa se talluq rakhtay hain.
Wazeh rahay ke Kanshi Ram ke yom-e-wafaat par talba ne ek taqreeb ka ineqad kiya tha aur sath hi moodi ko khat bhi likha tha.
Darasal 49 mashoor haisiyatoun ke zareya modi ko hujumi tashadud se mutaliq khat likhay janey aur phir un par watan se ghadari ka muqadma darj kiye janey ki khabrain guzashta dinon kaafi garam theen. isi khabar ke paish-e-nazar un talba ne modi ko khat likha tha. chunkay talba ko university se nikalay janey ki karwai khat likhay janey ke baad ki gayi hai, is liye kaha ja raha hai ke university intizamia unke is qadam se khush nahi tha. –YTN STAFF