Hyderabad. Aik ahem tabdeeli Telangana ke wazeer Information Technology, Sanat o Umoor Bairooni Mumalik Mr. K T Rama Rao ko aaj Mutahidda Arab Amarat (UAE) se mulk ka daura karne ka dawat nama mousool huwa hai. Press Release ke mutabiq UAE ki wizarat Umoor e Kharija ne Telangana ke wazeer ko aik khusoosi dawat nama rawana kya hai. UAE ke Wazeer umoor kharja Abdullah bin Zayed Al Nahyan ne Mr. K T Rama Rao ko mulk ka daura karne ki dawat di hai. Sheikh Abdullah bin Zayed ne khusoosi tazkara kya ke Hukoomat Telangana ne un ke haliya daura Hyderabad ke mauqa par inhen behtar baazabaadkari ki peshkash ki thi. Unhon ne kaha ke bahami umoor ki yaksoi ke liye Hukoomat Telangana ko Mutahidda Arab Amarat ki Hukoomat tamam noiyat ki madad o taawun faraham kere gi. Shaik Al Nahyan ne kaha ke hukoomat Telangana ke sath un ki Hukoomat mazeed kaam kere gi aur wazeer se khwahish ki ke taleem, sanat aur tijart ke shouba jaat mein bahami taluqaat ko mazeed mustahkam karne ke liye UAE ka daura karen. Mr. K T Rama Rao ne kaha ke unhon ne UAE Hukoomat ko pehlay hi sanat, tijarat aur Gulf Workers ke masaayel ke baaray mein aagah kardiya hai. Unhon ne UAE se daura ki dawat mousool honay par khushy ka izhaar kya.