New Delhi: Jamia Millia University ke qareeb shehriat tarmeemi qanoon ( CAA ) ke khilaaf mazahir mein, Ek na maloom shakhs khulay aam bandooq le kar ghus gaya aur phir Firing kardi. Is douran Firing karte hue, Kaha ”Ye lau Azadi“. Is Firing mein 1 shakhs zakhmi huva. Ye waqea takreeban do pehar 1:40 minute par pesh aaya. Jis ke baad inteshaar ka mahol peda hogaya.
Jamia Millia Islamia University ke talba Raj Ghat tak paidal yatra karne ki tayari kar rahay they. Tabhi ek nojawan un ke paas aaya aur is neh ”Ye lu Azadi“ Aur Jai Shri Ram ka naara lagaya, Aur fire kar diya. Goli Jamia Millia ke shadaab nami taalib ilm ke haath mein lagi. Shadaab Jamia Mascommunication ka taalib ilm hai. Shadaab ko Holi family Hospital mein daakhil karaya gaya hai. Police neh mulzim ko tehweel mein le liya hai. Aur is se poch tach jari hai.
Ittila ke mutabiq, Firing karne wala shakhs, Greater Noida ke Jewar ka rehne wala hai. Wo Facebook profile par khud ko Ram Bhagat Gopal likhta hai. Ye bhi bataya ja raha hai ke Gopal Jamia ka taalib ilm nahi hai. Aaj Firing se pehlay wo kayi baar Facebook par live bhi aaya aur is ne kayi post bhi likhe. Is neh likha tha ke ”Shaheen Bagh khail Khatam“. Is ke ilawa is neh kaha tha ke wo 31 January tak Shaheen Bagh mein ehtijaj khatam kar dega.
Is ne apni ek post mein, Logoun se kaha ke wo is ki ghair mojoodgi mein is ke kunba ki madad karen aur iss ne apni aakhri khwahish ke tor par likha ke ”Is ke jism ko Bhagva kapday mein lapeta jana chahiye aur logoun ko is ki aakhri rasomaat par ”Jai Shree Ram“ ka naara lagana chahiye. Ek aur post mein is ne kaha ke ”oh 2 saal qabal Uttar Pradesh ke Kasganj Motercycle Rally nikaltay hue Firing ke tabadlay mein halaak honay walay Chandan Gupta ki mout ka badla lega.
Firing ke is waqea par Jamia ke talba mein shadeed gham o gussa nazar araha hai. Jamia ki ek reserch Scholar ne kaha ke police ke samnay nojawan ne jis terhan be khauf ho kar goli chalaye hai, Is se police ki karkardagi par kayi terhan ke sawal uthate hain. Wo police se chand qadam ki doori par pistol lehrata raha aur police tamashai bani dekhatii rahi“.
Wazeh ho ke, Delhi ke hazaroun afraad aur talba tanzeemoun ne shehriat tarmeemi Act ( CAA ) ke khilaaf jantar mantar par muzahira kiya. Un mein bohat se loog aisay they jo janoobi Delhi ke Shaheen Bagh ilaqay mein chal rahay CAA mukhalif dharnay ka bhi hissa rahay hain. Ghair sarkari tanzeem ”United Against Hate“ Ke ek karkun Nadeem Khan ne kaha ”Ham chahtay hain ke hukoomat CAA, NRC aur NPR ko wapas le“.
Is muzahirey mein shirkat karne waloun mein, Jamia Millia Islamia, Jawaharlal Nehru University ( JNU ), Delhi University, Aligarh University
( AMU ), Maulana Azad qaumi Urdu University ke talba shaamil they. Shaheen Bagh ke mutadid muzahireen ne Jantar Mantar ke muzahirey mein bhi hissa liya. Shaheen Bagh mein CAA ke khilaaf ek mah se ziyada arsa se ehtijaj jari hai. –YTN STAFF