Cairo: Misar mein beti ko Train se bachanay ke liye jaan par khail janay walay baap par Railway ne jurmana aed kiya hai. Al-Masrad Website ke mutabiq Misri Railway intizamia ne Social Media par Viral honay wali video ke baad bachi ke baap par 50 Misri Pond jurmana kardiya.
Tafseelaat ke mutabiq Railway intizamia ne muaqqaf ikhtiyar kiya hai ke Misri shehri ne ye harkat karkay nah sirf apni balkay dosaroun ki zindagi ko bhi khatraat se dochar kardiya. Usay maal gaadi walay Platform se musafir Train ke Platform janay ke liye under paas istemaal karna chahiye tha. Is ke bajaye maal gaadi ke neechay se guzar kar musafir Train tak pouncha.
Railway Authority ke Engineers ki committee ne Al sama Aleya Railway Station ka dora kiya. Platforms ka muaina bhi kiya hai. Committee ke arkaan ne waqea ki tafseelaat jan-nay ke liye CCTV cameroun ka record bhi dekha hai. Yaad rahay ke Railway station par Train Platform par anay hi wali thi ke achanak ek bachi Platform se Railway line ke qareeb ja giri. Waalid ne ye manzar dekh kar apni beti ko Train ki zad mein anay se bachanay ke liye Railway line par chhalang lagadi thi. Railway line se Train 2 Minute tak guzarti rahi. Is douran station par mojood loog dam bakhud they. Har ek salamti ke liye dua karta raha.
Jaisay hi Train guzri aur dono bahafazat nazar aeye to Platform par mojood loog khusi se cheekhnay lagey. Har ek ne baap beti ko pur josh andaaz mein mubarakbaad pesh ki. Is waqeye ki video Clip Viral hogaya. Har ek ne bachi ke baap ke iqdaam ki tareef ki aur kaha agar wo bar waqat iqdaam nah karta to Train se chand Mile Meter ke faaslay par giri hui bachi jaan se haath dho sakti thi. –YTN STAFF